Shillong, Naitung 17 : U Managing Director jong ka Meghalaya Energy Corporation Limited (MeECL), u Sanjay Goyal ha ka sngi Nyngkong u la ong ba ka jingdon ka um ha dam Umïam ka la kiew bad kumta ïa ka jingpynlip bordig ha Shillong, Tura bad Jowai la lah ban pynhiar haduh ar kynta katba na bynta kiwei pat ki jaka sha ka 5kynta naduh ka 18tarik Naitung.
Katkum ka jingïathuh jong u, ka MeECL ha kine ki khyndiat taiew ka la bteng ban pynhiar ïa ki kynta pynlip bording bad mynta ka sah sa tang 5 kynta naduh ka 12tarik Naitung bad 4 kynta pat naduh ka 15tarik Naitung na bynta ki jaka ha sor.
“Ngi la nang pynhiar ïa ka jingbun kynta ka jingpynlip bording, da kaba buh hakhmat ïa ka jingnang kiew ka um ha dam Umïam bad ruh ban pyntikna ïa ka jingdon ka um katkum ka jingdonkam ha ka por tlang bad tad haduh ban da wan biang ka samoi ban wan,” u la ong.
Shuh shuh u ong ruh ba ïa mynta hi, ka jylla ka la lah ban pynphai ïa ka bording ba ki shim kylliang kaba poi haduh 450 million unit (baroh) kaba la pyndonkam da ka jylla ha kane ka aiom tlang bad ha ki samoi ba duna um.
U ong ruh ba ka MeECL ka don ïa ka thong ban pyntikna ba kane ka jingpynlip bording kan ym buh jingthut shuh ïa ki paidbah.
