Kyndang ki runar ïa ka ïing ha Nondeiñ khung palat ar lak tyngka bad ka ksiar

Nongstoiñ, Naitung 17 : Ka jing jyllei ki kam tuh ha sor Nongstoiñ da kaba kyndang ïa ki ïing ki sem da kaba ot ïa ki tala bad pynpait ïa ki jingkhang ka la nang jur ha kine ki sngi.
Dang ha ka miet sngi saitjaiñ kawei ka ïing jong u bah P.Mawlieh kaba don ha Nondeiñ ha syndah bad ka Meghalaya Rural Bank, ka la shah kyndang ha ki runar ki bym lah ban tip, ha kaba ki la ïoh ban rong haduh ar lak tam ka pisa, ar deng ki ksiar jong ki khun kynthei jong u, ar tylli ki cheque book kiba dei jong ka lok bad ka jong u.
U bah Mawlieh haba ïakren bad ki nongthoh khubor u la ong ba ha ka miet sngi saitjaiñ ym shym don briew satia, namar baroh shi ïing ki leit sha shnong Patharkhnang, namar ka don ka jingïaseng women week bad ha ka sngi u Blei ruh ka dei ka jingïaseng women Sunday kumta ha kitei ki ar miet ym don briew satia.
U la ong ruh ba dei ha ka step jong ka lah sngi u Blei ba ki don ki paralok kiba leit don kam shajan ka ïing jong u bad ki la ïohi ba ym shym la khang tala satia, ha kaba ki la pyntip sha u ha kaba u la wan beh wut wut bad u la lap ba ïa ka tala la dep ot bad la kyndang ïa ka jingkhang.
Haba u la rung ha pohïing u la lap ba ïa ka duli la pynpait bad ki jaka buh tiar ki la shah kyndang lut. Nalor kata u la ong ba la lap ruh ba ka pisa kaba u buh hapoh ka duli ryngkat bad ki Cheque book, nangta ar jur ki ksiar jong ki khun kiba la buh bha hapoh ka duli kim don shuh.
Halor katei ka jingjia u bah Mawlieh u la ong ruh ba la suba jur ba ki runar kiba la kyndang ïa ka ïing jong u, ki lah ban dei ki briew kiba la kyrni ha ka jingdih drok, lane ki lah ban dei ki briew kiba la tip lypa ba ha kitei ki ar miet ym don briew ha ïing namar katei ka jingjia ka lah ban dei ha ka miet sngi saitjaiñ.
Halor katei ka jingshah kyndang ïa ka ïing u bah Mawlieh u la leit ban buh da ka ejahar ha Nongstoiñ Police Station bad ki pulit ki la register ïa ka mokotduma bad ka jingtohkit ban lap ïa kiba don kti ka dang ïaid shakhmat.