Ka bym lah pdiang, ong ka HNYF halor jingdawa nongbah Tlang ka Achik ha Tura

Shillong, Naitung 17 : U President ka HNYF, Bah Sadon Blah ha ka sngi Nyngkong u la ong ba ka jingdawa jong ka ACHIK ban pynlong ïa ka Tura kum ka nongbah Tlang kadei ka bym lah satia ban pdiang.
“Ym sngewlah satia ban pdiang ïa kum kitei ki jingdawea. Balei? Namar ka Meghalaya ka dei ka jylla kaba rit,” ong u Bah Sadon haba kren bad ki lad pathai khubor.
Shuh shuh u ong ruh ba lada ïa baroh kawei ka Ri lah ban pynïaid tang na Delhi khlem da pynkynrïah ïa kano kano ka nongbah kumta ka jingmut ban dawa kyrpang la ka jong lane ki jaka treikam jong ka sorkar na kawei ka distrik sha kawei pat ka long tang ban wanrah shuh shuh ïa ka jingbym sngewthuh jingmut bad ka jingbym shaniah shuh hapdeng ki para riewlum jong ka Meghalaya.
Haba ïadei pat bad ka jingdawa jong ka ACHIK ba dei ban pyntreikam beit naduh mynshwa ïa ka roster system, utei u nongïalam ka HNYF u la ong ba um don satia ha ka bor ban kren ei ei halor katei ka bynta namar kum ki nongshong shnong ka Ri India ki don ïa ka hok ban dawa la ka dei ban dawa naduh ba sdang lane nangne shakhmat ban pyntreikam ïa ka reservation policy bad ïa ka roster system.
Da kaba kynthoh pat halor ka hukum ba pynmih da ka DC jong ka East Khasi Hills dang shen, u Bah Sadon u la ong, “Lada ki jingjïa ba kumne kumta ki jia hangne hangtai, ngi don ka tnad pulit ban tuklar hynrei ban shu ai beit da ka hukum khang dam ïa baroh ba ki nongshong shnong ki dei ban shong noh ha iing kadei ka hukum donbor pyrshah ïa ka hok im laitluid jong ki nong India bad ruh ïa ka hok ban ïaid laitluid.”
Ha kajuh ka por, u Working President ka KHNAM, Bah Thomas Passah u la ong ba ka jingdawa jong ka ACHIK kadei ka bym don nongrim ei ei. U ong ruh ba ha India dei tang ha Himachal Pradesh kaba don ar tylli ki nongbah, kata ka Shimla bad Dharamshala.
“Ka daw ka long ba ka ior bad ka jingthut ki lynti ïaid ha ka por tlang kadei ka dawbah kaba shem jingeh ban poi sha Shimla hynrei ha Meghalaya ka ïapher bad kam don satia ka jingdonkam ban don haduh ar tylli ki nongbah.”