Nongpoh, Naiwieng 30: Ka District Legal Services Authority (DLSA) hapoh ka jingpeit jong ka National Legal Services Authority ha ka sngi thohdieng ka la pynlong ïa ka prokram ïalap ba shisngi na ka bynta ki khynnah kiba la pep skul noh shiteng por ban plielad ïa ki khynnah ban ïoh ïa ka jingnang jingstad, ha ka shnong Jatah ha Ri-Bhoi.
Ha katei ka prokram ïalap la wan ban ai jinghikai bad pyntip shaphang ki jingïarap bad ki jingmyntoi ba ki khynnah ki dei hok ban ïoh da ka samla M Namsaw bad ka samla Q Mawphniang kiba dei ki Legal Aid Counsel, ha ka jingdonlang ki khynnah skul, ki paidbah nongshong shnong bad kiwei kiwei.
Haba kren ha katei ka sngi na ka liang kitei ki Legal Aid Counsel ki la pynshai paidbah halor shibun ki jingeh ba ïakynduh da ki khynnah bad ka jingdonkam ban ïada ïa ka hok ka jong ki, ryngkat ki skhim sorkar bapher bapher ka sorkar ka la mang na ka bynta ki heprit bad ki paidbah nongshong shnong bad kumjuh ruh ki jingthmu jong ka DLSA bad ki kam jong ka bad ki la pynshai paidbah ba ka DLSA ka thmu ban ai ïa ki jingshakri kiba laitluid bad kiba tbit sha ki bynta kiba kham tlot ha ka imlang sahlang ban pynthikna ba uwei pa uwei u nongshong shnong un nym sahdien ha kaba ïadei bad ki jingtip halor ka hok jong ki.
Kitei ki nongkren ki la pynshai ruh halor ka right to free and compulsory education Act 2005, Midday-meal scheme, Child Labour Prohibition and Regulation Act 1986, Prohibition of Child Marriage Act 2006 bad kiwei kiwei.
