Nongpoh, Naiwieng 30: Ka Dorbar Shnong jong ka shnong Nongpoh kumba ju leh man u snem ka la pynlong ïa ka jingpynkhuid ïa baroh kawei ka sor Nongpoh bad ki rudnong jong ka shnong ban wanrah ïa ka khuid ka suba khamtam ka jingitynnad jong ka shnong Nongpoh baroh kawei.
Ha katei ka jingpynkhuid shnong la wan ruh ban shim bynta da u Bah Mayral Born Syiem MLA ka Nongpoh kum u kongsan ha ka jingdonlang u Bah Balajied Ranee MDC, Bah S Mynsong Rangbah Shnong Nongpoh, ki riew rangbah lem bad ki paidbah nongshong shnong.
Na ka liang ki nongïalam shnong haba kren ha katei ka sngi ki la pynpaw ba ka khuid ka suba ka long kaba kongsan ban wanrah ïa ka koit ka khiah, bad ka jingitynnad jong ka sawdong sawkun jong ka shnong bad kane lah ban wanrah tang lada ki paidbah ki snohkti lang naduh ki nongshong dukan ba kin nym bret pathar ïa ki jaboh jabaiñ hynrei ban buh shi jaka bad ban bret ha ki jaka ba dei ban bret.
Lah ban ruh ban sakhi ba bun na ki paidbah kim ju burom ïa ka khuid ka suba hynrei la ïohi ka sor Nongpoh ka kham khuid tang ha ka sngi pynkhuid shnong, hynrei ki paidbah ki klet noh ynda la dep pynkhuid bad sdang biang ka jingbret pathar kat shaba lap ba shem hynrei lyngba kane ka jingpynkhuid shnong ki nongïalam ki la kyrpad ba kin pynneh ïa ka khuid ka suba jong ka shnong Nongpoh.
U Bah Mayral Born Syiem kum u kongsan haba kren ha katei ka sngi u la ong ba ka long kaba donkam ban wanrah ïa ka khuid ka suba jong ki shnong ki thaw bad kyrpad ruh ïa ki paidbah ban snohkti lang bad ban pynmlien man ka sngi ban nym bret pathar ïa ki jaboh jabaiñ hynrei ban bret ha ki jakaa ba dei ban bret.
Ha katei ka sngi na ka liang u MLA kum ka jingsnohkti lang bad ka Dorbar Shnong Nongpoh u la ai jingïarap da ka work order kaba T.15 Lakh na ka bynta ban pynheh ïa ka iing Dorbar jong ka shnong bad kular ruh ban dang wanrah shuh shuh ki kam pynroi ha ki por ban dang wan.
