Shna pynitynnat ka Sorkar ïa ki kam klas ha Lyngïong bad Mawngap Government LP School

Shillong, Naiwieng, 30: Da kaba buh hakhmat ïa ka thong ban shna pynbha ïa ki skul hapoh ka jylla Meghalaya ha ka sngi Saitjaiñ la plie paidbah ïa ki kamra klas ba la shna pynitynnat ha Lyngiong Government Lower Primary School bad ha Mawngap Government Lower Primary School.
Ka jingshna pynitynnat ïa kine ki kamra klas ka long lyngba ka jingïatreilang hapdeng ka Smart Village Movement (SVM) bad ka One School at a Time (OSAAT), da kaba thmu ban pynkylla dur ïa ka jingsaiñdur ha ka pule puthi sha ki shnong nongkyndong ha ki skul Sorkar.
La sdang ha u Risaw, 2023, ban shna pynbha ïa ki kamra klas ba la jot ha ki skul sha ki nongkyndong, ban maramot ïa ki ing skul ba la jot, ban shna pynheh ïa ki kamra klas ba khapngiah.
Kane ka thong ka long ban pynïoh jingmyntoi ïa ki 478 ngut ki khynnah kiba pule ha Lyngiong Government Lower Primary School bad ha Mawngap Government Lower Primary School.
Ka SVM da ka jingïatreilang bad ka OSAAT, ka la lah ban shna ïa ki kamra klas ba thymmai, ka jingshna pynbha ïa ki paiñkhana bad Building as Learning Aid (BaLA) da kaba dro ïa ki Alphabet ha ki kynroh, ki dak jingkheiñ, ki jingtip shaphang ka saïan, bad kiwei kiwei ki jingdro kiba pynmyntoi hi ïa ki khynnah skul manla ka snig ha ka pule ka puthi.
Kane ka projek ka kynthup ruh ïa ka jingbuh ïa ki tiar ba thymmai ban pynthikna ba ki khynnah kin ïoh ïa ka jaka shong ba paka ban thoh bad pule manla ka sngi.
Ha ka jingplie paidbah ïa kine ki kamra klas, u Chief Secretary jong ka Sorkar Jylla u Bah D.P. Wahlang ula long kum u Kongsan.
Haba kren ha ka jingïalang u Chief Secretary u la pynshlur ïa ki khynnah skul da kaba ong, “phi la ïoh mynta ïa ki kamra klas kiba phuh bad kiba itynnat, namarkata dei ban phaikhmat kumno ban pynjanai ïa ka rukom hikai. Ki nonghikai bad ki School Management Committee ki don ka bynta kaba kongsan bha. Ki dei ban leh kat ka jinglah jong ki bad ban ïatreilang bad ka Sorkar ban weng ïa ki jingeh bad ki jingthylli ba ki mad. Ki kmie ki kpa ruh ki dei ban pynshlur ïa la ki khun ba kin leit sha ki skul, ym dei ban don iwei ruh ban shong ha iing.”
La sakhi lang ha ka jingplie ïa ki kamra klas da u Executive Director jong ka MBDA u Ram Kumar uba long ruh u Nodal Officer jong ka Smart Village Movement Project, u CEO jong ka Meghalaya Basin Development Authority (MBDA) u Dr. Sampath Kumar, u OSAAT Volunteer u Srinivas Prasad, u Sub Divisional School Education Officer (SDSEO) Bah J.A. Marweiñ, u Cluster Resource Coordinator SSA Bah Wallambok Mawlong, u Block Mission Coordinator, SSA Bah Samborlang Skhemlon bad ki nongmihkhmat na ka SVM bad OSAAT.
Nalor kine ki kynrem ki lyndan, la sakhi lang da ki nongshong shnong, ki kmie ki kpa jong ki khynnah skul, ki dkhot jong ki School Management Committee kiba pynpaw ka jingsngewnguh ïa ka jingshna pynbna ïa ki kamra klas.
Ïa ka Smart Village Movement la sdang ha Meghalaya ha u snem 2020 da ka jingïatreilang bad ka Berkeley Haas. Naduh ba la sdang, ka SVM ka la lah ban pyntreikam pura ïa kiba bun ki projek ha ka koit ka khiah, ka pule puthi, ka rep ka riang, ka jingshna ïa ki jingtei bad bun kiwei kiwei ki kam ha kylleng ka jylla.