Jowai, Naiwieng, 30: Ka All Jaiñtia Muster Roll Workers & Labour Union (AJMRW&LU) ka la kyrpad ïa baroh nongtrei Muster Roll/Casual wage/ ki dkhot ka MBOCWB Labour Department bad baroh kiba don bynta lang bad ka Seng ba kin poi sha ka General Meeting ka ban long ha ka 2 tarik, Nohprah ha ïing Dorbar ka Tpep Pale, Jowai ha ka por 10:30 baje mynstep.
Ki mat kiba kongsan ban ïakren ha kane ka sngi ki long halor ka jingpynslem ka Sorkar Jylla ban pynkiew ïa ka bai bylla sngi (VDA) kaba dei ban pyntreikam naduh ka 1 tarik, Risaw, 2024 bad ka jingbymsiew ka Sorkar ïa ka bai bylla sngi kaba dei hok ban pynkiew shisien san snem (Basic Floor Rates) naduh ka 1 tarik, Risaw, 2023 katkum ka Aiñ Minimum Wage Act 1958.
Da ka jingbym patiaw ka Sorkar Jylla ban pyntreikam ïa kine ki kam kiba dei hok ban ïoh, khamtam ki jingkiew dor lut ki marbam ha ïew ha dukan, ka bai bording, ka bai kot bai pule ki khun ki kti bad kiwei kiwei kiba la ktah ïa ki rukom im ba manla ka sngi jong ki nongtrei bylla sngi.
Ka Seng ka la kyrpad ban ïa poi sha ka jingïalang ban ïakren ïa ki kam ïap kam im jong ki nongbylla sngi, kiba la im ja na ka jingsiew bainong sngi ka Sorkar.
Ha kane ka jingïalang u Founder bad Adviser ka Seng u Bah Khroo L Pariat un sa ïadon lang ban ai jingkren bad ban batai bniah ïa ki mat ba donkam, la ong u kyrwoh na ka seng.
