Shillong, Naiwieng, 30: Ka Meghalaya Joint Council of Trade Unions & Associations (MJCTU&A) ka la pynpaw ïa ka jingsngewsih kaba khraw halor ki kynrum kynram hapoh ka skulbah NEHU kiba la jia ha kine ki khyndiat taiew.
“Ka long kaba sngewsih shibun ban ïohi ba ka jingïakhih da ki samla pule jong ka NEHU ka la palat ïa ka lai taiew. Ka long kaba pynduh jingkyrmen bad kaba pynsngewsih shibun na ka liang jong ngi ban ïohi kumno ki samla pule ki la hap ban shim da ka lynti ban pynlong da ka jingshah thngan,” ong u kyrwoh ba la phah da u President ka MJCTU&A u J.L Das bad u General Secretary u Bah E. Lynshing.
“Ka Association ka pynpaw ba kum kine ki jingeh ba la pynmih da u Vice Chancellor ba mynta jong ka NEHU bad ka ka jingpyrshah ïa ka jingleh donbor da kiba don ha ka bor pynïaid. Ngi kyntu ïa ki bor ba dei peit ban shimkhia mardor ïa jinglong jingman kaba la pynthut bad kaba pynduhnong ïa ka lawei jong ki samla pule,” ong ka MJCTU&A.
“Da ka jingïasnohkti lang bad ki samla pule kiba ïakhih ngi ai jingkyrshan pura bad ngi kyntu ruh ïa ka President ba donburom jong ka ri bad ïa ka Sorkar Jylla ban peit bniah bha ïa kane ka kam bad ïa ki mat jingdawa jong ki khnang ba ka burom jong ka University kan paw biang sa shisien,” la bynrap u kyrwoh.
