Jowai, Nailur 10: Ka Advocacy Reform Movement (ARM) mynta ka sngi kala ïoh ban ïakynduh bad u myntri ka koit ka khiah jong ka sorkar jylla u ma Wailadmiki Shylla ha kaba ïadei bad ka jingsdang ban tei ïaka Government Nursing College hapoh ka Ri-Lum Jaiñtia hadien ba u Myntri Rangbah ula dep pynbna paidbah ha une u snem bala dep.
Hynrei haduh mynta ka seng kam pat ïoh jingshai bha halor kane ka kam la ka sorkar kala ïaid shakhmat ne em, ka seng ha ka jingïakren bad u Myntri ula pynsngew na ka liang ki bor shnong kim pat ïoh ban ïasoi dep ïa ka jingïateh kular. Shuh shuh ula pyntip hadien bala dep ban soi ïa ka agreement ka kam kan sdang treikam noh shen.
Na ka liang ka seng kala pynpaw ka jingsngewkmen ba ka jingdon jong kane ka Govt. Nursing College kan long ka jingmyntoi kaba khraw eh ïa ka Rilum Jaiñtia baroh kawei (East bad West), ha ka juh ka por kan long ka jingmyntoi ïa ki khun samla kiba wan na ka longïing longsem kaba duna.
U Buromlang Dkhar uba dei u President bad General Secretary u Jimmy Langstan kila pynpaw ka jingsngewnguh ïa u myntri ha kaba ïadei bad kane ka kam kaba la sdang ban treikam noh shen.
