Kyntu ki MDC na EJHD ïa ki trai coke ban shim ki lad ban tehlakam ïa ka tdem bad ban thung dieng

Khliehriat, Nailur 10: Ki MDC kiba na East Jaiñtia Hills District ha ka jingïalang ba la pynlong mynta ka sngi ha East Side Inn Hotel ki la kyntu bad hukum ïa baroh kiba dei ki trai jong ki karkhana coke ba don hapoh ka district ba ki dei ban shim ïa ki lad ki lynti ban tehlakam ïa ka jingmih ka tdem da kaba pyndonkam da ki kor ki bor kum ki filter bad ruh ban thung ïa ki dieng ha ki sawdong sawkun jong ki karkhana jong ki.
Ki MDC kiba la ïa don ha kane ka jingïalang ki kynthup U MDC jong ka Sutnga nongkhlieh Constituency, uba bat ruh kum u EM Incharge Forest ha Jaiñtia Hills Autonomous District Council, u bah Hembertus Nongtdu, u MDC jong ka Tuber-Wapungshnong Constituency, u bah Lasky Rymbai, uba bat ruh kum u Deputy CEM-JHADC, ka MDC jong ka Rymbai-Khliehriat constituency, ka kong Violet Lyngdoh, u MDC jong ka Musniang Rangad, u bah Waidameshwa Siangshai, u MDC jong ka Sumer Constituency, u bah Krison Langstang, u MDC na Saipung, u bah William Theite bad u MDC jong ka Sutnga u bah Seibor Shadap, la ia don lang ruh u President jong ka East Jaintia Hills Coke Manufacturing Association, u bah D.Swer lem bad u Secretary, u bah V.Nongtdu lem bad ki trai jong ki karkhana coke kiba na East Jaiñtia Hills, shuh shuh la ïa don lang ruh u Range Forest Officer jong ka JHADC, u bah R.Syngkrem.
Kum ban shu bynrap ha East Jaiñtia Hills District ki don kumba arphew tylli ki karkhana coke.
Haba kren sha ki pathai khubor, kata hadien ka jingïalang, u bah Hambertus Nongtdu u la ong ba kum ki nongmihkhmat ki don ka jingsngew khia haba peit bad iohi ba ki karkhana coke ki la don hajan ki shnong ba sah ki briew bad ki sngewkhia ba ka lyer kaba sma ka ju wan beh na ki karkhana coke, te ha kane ka jingïalang ki MDC ki la pynsngew sha ki trai coke ïa kaei kaba ki sngewkhia kaba ki paidbah ruh ki la ud, la ong ruh na ka ka liang ki trai coke ki la kular ban ai ka jingiatreilang bad kohnguh ïa kaei ba ki MDC ki la bthah bad ki la kular ruh ban leh ïa kaba donkam kaba long katkum ka Guideline ba la bthah da ka tnat Meghalaya State Pollution Control Board.
“Ngi la hukum ba ki trai coke ki dei ban buh lane install da ki filter ban tehlakam ïa ka jingmih ka tdem, ngi la ong ruh ïa ki trai coke ba kin nang iai bteng ïa ka jingthung dieng ha ki jaka ba don ki karkhana khnang ban ioh ïa ka lyer kaba khuid” ong u bah H.Nongtdu.
Shuh shuh la bynrap ruh ba lada ki trai jong ki karkhana coke kim bud ïa ki jingbthah bad jinghukum, na ka liang ka tnat na JHADC kaba dei peit kan sa shim kam da kaba tyngeh bad kitei ki MDC kin sa pynlong ruh da ka jingjurip.