Pynlong ka ophis u DSEO-EJHD ha shnong Rangad ban pynshai halor ka jingdonkam ka jingnang jingstad

Khliehriat, Nailur 10: Kum shibynta ban kyntiew ïa ka jingnang jingstad ka ophis jong u Office of the District School Education Officer, East Jaiñtia Hills District,mynta ka sngi ka la pynlong da jingiaid rally bad pynlong ruh ïa ka prokram ai jingpyshai ha shnong Rangad bad kane ka prokram ka dei shibynta jong ka project kaba don hapoh ka ULLAS (Understanding of Lifelong Learning for All in Society) Project bad kane ka prokram ka long ruh kum ka jingpynshlur ban iashimbynta ha kino kino ki kam kiba ïadei bad ka thoh ka tar ba kynthup ruh ka jingiohi jngai ban kyntiew ïa ka jingnang jingstad ha ka imlang ka sahlang.
Haba kren ha ka jingialang, u District School Education Officer, East Jaiñtia Hills District, u bah R. Diengdoh u la kren halor ka jingdonkam ka jingnang jingstad bad ong ruh ban wad ïa ka jingnang jingstad kam don jingkut la ka dei ha kano kano ka kyrta ruh, u la pynshai ba ka jingiaid rally kam da mut eh tang ban kyntiew ïa ka jingnang jingstad hynrei kane ka dei ruh ka rynsan ban pynshlur ïa ki briew ba kin tip bad ruh ban pashat ïa ki jingtip sha kiwei ruh bad ong ba kane ka jingiashimbynta lang ha ka rally ka pyni ba ym don iwei ruh i ban shah iehnoh shadien ha kaba ïadei bad ka bynta ha kaba wad ia ka jingnang jingstad.
U Special Educator, u S. Kamar, u la batai bniah ïa ki jingthmu kiba don hapoh kane ka ULLAS (Understanding of Lifelong Learning for All in Society) Project bad kren ruh ïa ka phang kaba pyni ïa ka jingdonkam ban kyntiew ïa ka jingnang jingstad, u la pynshlur ïa ki dkhot jong ka kynhun ban kin iashimbynta ryntih ban wan shakhmat ban pynrung kyrteng ban shim ïa kane ka lad ka kabu kaba don ha kane ka project kaba lyngba kane ka prokram.
Ha ka jingiaid rally bad ha ka jingïalang la wan ban iashimbynta lang da ki khynnah skul, ki nonghikai, ki heh sorkar kiba na ka tnat ka pule puthi lem bad ki nongshong shnong bad lyngba ki jingthoh ha ki baner, ki placard la pynsaphriang ïa ka khubor ba ïadei bad ka thoh ka tar, ka pule ka puthi bad ruh ki kyntien ban pynshlur ban shim ïa ka synjam ban wad shuh shuh ïa ka jingnang jingstad bad pynshlur, ai mynsiem ïa ki dkhot ka shnong ban kyrshan lang ha ka bynta ban kyntiew ïa ka jingnang jingstad.
Ha kane ka prokram la sam ei sha ki nongshong shnong ïa ki kot pule bad ki tiar ba lah ban pyndonkam ha ka thoh ka pule bad la pynshlur ruh ïa kito kiba la kham rangbah ha ka kyrta ba kin mih shakhmat ban wad ïa ka jingnang jingstad la ha kano kano ka kyrta ruh kam pher.