SHILLONG, Nohprah 14: Ka jingkyrmen jong ka Shillong Lajong FC ban pynkut ïa ka jingïakhun ba khadduh hala ïing jong u snem 2024 da ka jingjop kam shym la seisoh ha kaba ka la ïakhaid khlem don ba lah ban pynkhihjar pyrshah ïa ka Gokulam Kerala FC hynne ka sngi Saitjaiñ ha ka wat ïalehkai ba san (Matchday 5) jong ka lympung I-League 2024-25.
Kane ka jingiakhaid ka dei ka sien kaba lai ïa ka Shillong Lajong mynta ka samoi bad kaba lai sien lynter ïa ka kynhun ban khylliap ïa ka jingïalehkai khlem da shah thep ha ka liang pyrshah (clean sheet). Kane ka shi point ka la kyntiew ïa ka Lajong ha ka kyrdan ba san. Haduh mynta ka Lajong ka la kamai 6 point na ki san tylli ki jingialehkai (jop shi sien, ïakhaid 3 bad rem 1). Ka Gokulam Kerala ruh ka la kamai 6 poiñ bad ka don ha ka kyrdan kaba hynriew, tang hadien ka Lajong da ka jingïapher kol.
U coach jong ka Lajong u Jose Carlos Rodriguez Hevia u la pynkylla tang ïa u wei u rangïalehkai na bynta ka kynhun sdang, da kaba wanrah ïa u Hardy Cliff Nongbri ha ka jaka jong u Renan Paulino de Souza uba la mynsaw.
Lah ban kdew ba kane ka dei ka jingïalehkai ha kaba baroh arliang mamla ki la trei shitom ban thaw ïa ki lad khamtam ha ka kylla miet, ban ïoh pynkhihjar. Ki la don bun tylli ki kabu ba la pyrshang thep kol ha baroh arliang ki tduh kol; kaba la pynlong ïa baroh arngut ki nongap kol ban bunkam ha ka ban ïada ïa la ki jong ki kol, watla ym shym la don ba lah ban pynurlong.
Haduh kaba kut jong ka por ym shym la don satia ba lah ban pynïakhlad ïa kine ki arliang mamla, kaba la pynlong ïa ki ban khur mar 1 point na kane ka jingïalehkai.
Ka Lajong, kaba la ïakhun baroh san tylli ki jingïalehkai ba nyngkong jong kane ka samoi ha la ïing, mynta kan leit sha ka Delhi FC na bynta ka jingïalehkai kaba hynriew (Matchday 6) jong ka ha ka 19 tarik u Nohprah, kaba dei ka jingïalehkai kaba khatduh jong u 2024 tad haduh ban wan u snem thymmai.
Ki rangïalehkai ka Shillong Lajong kiba la mih madan ha katei ka sngi: Ranit Sarkar (GK), Ronney Kharbudon, Kynsailang Khongsit, Daniel Goncalves, Kenstar Kharshong, Damaitphang Lyngdoh, Hardy Cliff Nongbri, Imanol Arana Sadaba, Figo Syndai (sub Phrangki Buam 56′), Douglas Tardin, Sheen Sohktung (sub Marcos Rudwere Genar Silva 56′).
