Kam long shuh kaei kaei kaba phylla ba ha kine ki sngi ka Mobile phone ka la long kawei na ki atiar kaba ïaid kam tam ym tang na ka bynta ki paidbah kiba la heh la san hynrei wat ïa ki khyllung khynnah ruh. Ka long kaei kaei kaba ym sngew lah ngeit ba lada ym ïoh mobile ki don ki khyllung ki bymlah ban bamja ruh bad tang shu la ïoh mobile wat ki khynnah kiba klang katno katno ruh ki kylla tip sngi bha bad shongkhop hajuh kim ju pyndik shuh ïa ki kmie ki kpa. Hynrei ka long kaei kaei kaba sngewsih ban ïoh hikai na kaei kaba la jia ha ki katto katne ki longkmie na ka ka jingai mobile ha ki khun ki la ktah ïa kiei kiei ki bymdei kat haduh ba ki briew kiba riam lyngba jong ki link ki la ïoh ban tuh lut wat ïa ka pisa na ka Bank Account namar ba kata ka mobile ka dei kaba la ju pyndonkam ruh na ka bynta ki banking Internet bad kiwei pat ki jingdonkam.
Ka la don ruh ka jingjia ha kaba iwei i longkmie i la shah hacked ka Facebook Account jong i tang na ka daw ba uta u khun rit jong i uba la ju pyndonkam ïa ka mobile jong i ban ïalehkai ula kum ïoh khnoit ïa ka link ba la riam da ki briew. Lyngba jong kata ka jingshah hacked ïa kata ka account Facebook kita ki briew ki la pyndonkam bakla ban kyrpad ne dawa pisa na kito ki paralok kiba don ha kata ka friend list jong i. Ka jingdawa pisa ka la long lynba jong ka jingpynbieit paidbah ban ïa thep ne invest pisa ha kata ka kam kamai suk, katba phewse kam dei shisha hynrei baroh ka dei tang ka kam thok kam shukor suda. Ki bor ba dei peit ïa ka cyber crime jong ka tnad pulit ki ïoh ïa kiba kum kine ki jingujor na ka por sha ka por bad ki ki spah hajar tylli kum kine ki kam shukor ki jia ha kine ki sngi.
Ka jingailad ban pyndonkam mobile ïa ki khynnah kiba dang khie dang san ka ktah shibun ïa ka rukom pyrkhat bad ïohi jong ki ïa ka lawei jong ka jingim namar bun ki i kumba ka jingim ka shu long beit tang kumba lah ban ïohi lyngba jong ki internet. Ki lah ban don lehse ki khynnah kiba don ka jingproh ka jabieng ba kilah ban kem bad sngewthuh ïa ka bor jong ka jingstad, hynrei kiba bun hi ki kham ïohkem beit ïa ka jingim kaba shu suk beit kumta ka ktah ïa ka jinglah jong ki ban trei shitom na ka bynta ban roi ha ka pule puthi. Kane ka ktah shibun ïa ki katto katne ki longiing kiba ngat ha kane ka jingeh namar ba wat la ki khun jong ki ki la triem shisha ban lehkai mobile hynrei da ïoh result na skul pat ki phiel lut jan baroh ki sobjek. Kumta tang kita kiba mad ïa ka jingeh shisha ki lah ban sngewthuh ka jingma kaba kumno ka ap ïa kane ka juk kaba mynta.
Mynta u snem ngi la sakhi ba wat ha kane ka shnong barit jong ngi ruh u la don u pud haduh ba i khynnah ba dang 10 snem in dkhat ïa la ka jong ka jingim tang na ka daw jong ka Mobile. Kum kane ka jingjia ka kdew ïa ki dak ki shin kiba ym sngewtynnad ha ka imlang sahlang. Ka ktah shisha ïa ka lawei jong ki khynnah khamtam ha kane ka juk kaba shu ïabeh beit ïa ka jingnang jingstad. Namar ka dei tang ka jingstad ne ka bor jong ka jingpule ba ki paidbah kin lait na ki jingeh namar ba kin don ïa ka bor pyrkhat kumno ban lah ban kyrshan ïa la ka longrynieng. Kiba bun bah ki kmie ki kpa ki lynñiar ha la ki jong ki rympei ïing na kiba kum kine ki jingeh kiba ki ïakynduh bad don haduh u pud ba ki briew ki babe ba ki long kiba riewspah bad ïoh lut kat kaba kwah namar ba ka wanrah ïa ki jingeh kiba kum kine.
Kine ki dei shisha ki sngi kiba eh ban pyrkhat bad ka long shisha kumba ong u myllung ba don ka ma haba la than eh ka suk. Ka Mobile kadei kawei na ki atiar kaba la pynsuk shisha ïa baroh ha kine ki sngi ba mynta. Mynta ym donkam Kalkulator shuh, ym donkam baje shuh, ym donkam Note Book shuh, ym donkam khulom shuh, ym donkam toslait, shuh. Haduh ka TV ruh kim da kham peit shuh, ki kot khubor ruh ym da kham pule shuh, Ha kine ki sngi leit wat ki Computer bad Laptop ruh la kham duna ka jingpyndonkam wat da ki khynnah ba ju mlien ba ïalehkai Game ruh. Baroh kiei kiei ki don lut hapoh jong ka Mobile naduh kiba bha tam haduh kiba sniew tam. Ha ka mobile ngi lah ban pule naduh ki Bible App, ki khubor ialap shaphang ka jingpynim, ki jinghikai ba kynsai kynsai na ki shakri U Blei haduh ki jinghikai shaphang ka jingstad jong ka pyrthei bad ki jingtip kiba khlem pud khlem kyndon shuh, hynrei ha kane ka juh ka atiar ki don ki kam kiba kynsha na kiba kynsha tam ka ktah jur wat ia ka akor ka burom briew ruh kaba long ka mynkoi kaba shyrkhei lada ngi lait bad ngi syntuid sha kata ka niamra kaba jylliew tam jong ki jingsniew bad jingshyrkhei jong ka pop. SHISHA DON KA MA HABA LA THAN EH KA SUK.
