Shillong, Nohprah, 14: Ka Mawlai Block Congress Commitee (MBCC) da ka jingïahunlang ka la tyrwa ïa ka kyrteng jong u Bah Wanseng Jyrwa uba long ruh u Deputy Rangbah Shnong barim jong ka shnong Mawlai Nongkwar kum u kyrtong MDC na Mawlai Constituency ban aireng ha ka elekshon jong ka Khasi Hills Autonomous District Council ka ban sa long ha u snem 2025.
Ïa ka rai bad ka jingai jingmynjur la shim ha ka jingïalang kaba la long ha ka sngi Saitjaiñ da ka jingsakhi lang jong u dkhot ka Meghalaya Pradesh Congress Committee (MPCC) u General Secretary ka Mawlai Block Congress Committee ryngkat ki nongkitkam ka jong ka Mawlai Mahila Block Congress, ka Mawlai Youth Congress nalor ki nongkyrshan jong ka seng Congress ha ka jingïalang kaba la long ha Mawlai Nongkwar.
Haduh mynta ka Congress kam pat pynbna satia ïa ki kyrteng jong ki kyrtong watla kiwei kiwei ki seng saiñpyrthei ki ladep pynbna ïa ka thup kyrteng banyngkong.
