Shillong, Nohprah 14: Ka Tamasa, ka thmu ban pynpaw pyrthei ïa ki jinglong ba kyrpang jong ki paid riewlum jong ka North Garo Hills, ka la kutnoh mynta ka sngi da ki prokram bapher bapher.
Ha ka sngi sdang kaba dei ha ka sngi Thohdieng u Deputy Speaker bad u MLA u Timothy D Shira ki la don lang kum u kongsan bad symbud kongsan ha ka sngi plie bad kiba la ïaroh ïa ka bor pynïaid district ba ki la pynlong ïa kane ka prokram kiba pher na kiwei pat ki jait tamasa.
Lah ban ong ba kane ka tamasa mynta la kumba 4 snem khlem da la lah ban pynlong na ka daw jong ka khlam Covid-19, hynrei mynta u snem la ïoh ban pynlong biang ban ailad ïa ki nongshong shnong jong ka district ban ïoh shim bynta ha ka rynsan ban pyni ïa ki sap ki phong jong ki, ban kyntiew ïa ki kam khaïi ki nongshong shnong bad kumjuh ruh ban kyntiew ïa ka ïoh ka kot ki nongshong shnong.
U Shira u la kular ha ka jingïalang ban pynlong shuh ïa kane ka tamasa Aowe Festival kaba kham heh ha kine ki snem ban wan da kaba bei pisa bad da ka jingïatreilang bad u MLA jong ka district.
Ïa kum kine ki juh ki festival la pynlong ruh ha kiwei pat ki district da kaba ai ïa ki kyrteng kiba ïadei bad kane ka thaiñ. Ha North Garo Hills ka Aowe Festival ka long ka dak jong kawei ka sub-tribes jong ka kynhun Garo kaba la bna halor ka jinglong babha jong ki briew bad ka jingieid jong ki ïa ka bam, ka tem ka put bad ki jingshad.
Hadien ka jingplie u Shira u la plie ruh ïa ki dukan ba la pyninam da ki tnat sorkar bapher bapher kum na ka tnat Health, Agriculture-Horticulture, Fisheries, Handlooms, DCIC, bad kiwei kiwei.
Ha kane ka sngi u Shira u la plie ruh ïa ka ‘Health ATM’, kaba la khmih bniah shaphang ka jingpang jingshitom jong ka met.
Ki kam ki jam kiba la pynkhreh ha kane ka tamasa kaba arsngi jong ka Aowe Festival kaba kynthup ïa ka jingpyninam ïa ki syntiew bad ki jhur ki jhep, ki jingïalehkai jong ki trai ri trai muluk, ka jingïakob shet, ki jingïakob rwai, ki jingïakob shad, ki jingïakob thei bad rang bha briew, ka baby show bad rock concert da ki kynhun tem bapher bapher na kane ka thaiñ.
