Jowai, Jymmang 15: Ka War Jaiñtia Students’ Union (WJSU) Central Body Amlarem ka la aiti da ka jingthoh ha u MP ka Lok Sabha u Dr. Ricky A.J Syngkon bad un ïarap ban buddien ïa ki hynriew tylli ki mat jingdawa kiba donkam jong ka thaiñ War Jaiñtia, da kaba leit pynsngew shaduh ki myntri bad ka tnad treikam jong ka sorkar kmie.
Kaba nongkong ka seng ka la dawa ïa ka rukom pyntrei ïa ka surok National Highway No-206 na Dawki haduh Amlarem bala pyntrei da ka National Highway Authority of India. Namar katkum ka projek ban shna ïa kane ka surok ka la kot haduh 43 klur, hynrei ka jingpyntrei kam ïahap shun bad kiba bun ki bynta jong ka surok kiba julor lut.
Kaba ar ka seng ka la pynsngew halor ka jingpynslem ban shna ïa ka Eklavya Model Residential School kaba don Amladkur Civil Sub-Division, halor kane ka seng ka dawa ban buddien ïa kane ka kam bad ka Ministry of Tribal Affairs, jong ka sorkar kmie naduh ka rukom pynshna (construction) bad ka rukom pynïaid ïa ka skul, da kaba ong ka jingïoh ïa kane ka skul kan long ka jingmyntoi kaba khraw ïa ki paid ka War Jaiñtia.
Ka seng ha ka mat ba lai ka la dawa ban pynbha ïa ka rukom treikam jong ka Dawki Land Customs Station Transit Point kaba don ha Muktapur da ka jingïatreilang bad ki bor ka shnong Muktapur, khnang ban ïaidbeit ka jingshalan ïa u mawshun na Syndai-Trangblang bad na Bataw-Lakadong sha ri Bangladesh.
Kaba saw ka seng ka la pynsngew bad ka jingbym pyntrei kam ïa Residential School kaba don ha shnong Pdengsha kap, Amlarem Civil Sub-Division, ka seng ka dawa na u MP ban buddien ïa kane ka kam khnang ban sdang noh ïa ki lad jinghikai ha katei ka skul kaba la dep ban shna.
Kaba san ka seng ka la kyntu ïa u MP ba un tukla ïa ka rukom pynïaid ïa ka Dawki Land Port khnang baka kamai kajih kan long kaba ïaid beit ïaid ryntih, namar kumba long mynta katei ka Dawki Land Port ka la shim ïa ka bai shalan ha ka dor kaba 1000+ kawei ka trok kir mar hashwa ban rung sha Bangladesh. Kane ka la long kaba palat ïa ka dor ba la buh da ka sorkar, ka seng ka la kynnoh ruh ka jingshim ïa kane ka dor kan pynïoh nong ïa ki nongpynïaid kaba kot sha ka 1000+ klur ha ka sngi snem kum ka (Black Money).
Kaba khadduh ka seng ka la kyntu ban pyntrei noh ïa ka Leshka Stage II Hydro Power Project, namar ka jingdawa ïa ka bording mynta ka la long kaba donkam eh ïa katei ka thaiñ baroh kawei bad kan long ka jingmyntoi ïa kiba bun na ka jingwan katei ka projek.
Ka WJSU ka kyrmen skhem ba u MP jong ka jylla un shimkhia ïa kine ki mat jingdaws kiba donkam eh jong ka thaiñ War Jaiñtia bad kan long ruh kajingmyntoi ïa kiba bun ba lang, pynkut ka kyrwoh na u President ka WJSU Central Body Amlarem bah Syndai Swer bad u General Secretary bah Everest Langstang.
