Shillong, Jymmang 15: Ka khubor ba la ïoh na ki pulit la ïathuh ba ka Hally Conia Marpna ka la phah ka jingujor ba mynta u bnai ki runar bym lah ban ithuh ki la prong hapoh ka ïing jong ka kaba ha Mawïong Umjapung Tariang-A, Shillong bad ki la tuh kawei ka marble cutter Ninjato, saw tylli ki earthing copper plate, bad ka pisa kumba T. 1,300/-, bad kiwei kiwei ki tiar.
Ha kawei pat ka jingjia ki pulit ki la ïathuh ba u Rakjring R Marak u la phah ka jingujor ba hapdeng ka mied jong ka 12 & 13 tarik mynta u bnai, ki runar bym lah ban ithuh ki la tuh ïa ka thuk thuk jong u kaba don u nombar ML-13-8813 napoh ka ïing sah wai jong u kaba ha Songsak A’gitokgre (EGH).
Shuh shuh ha kawei pat ka jingjia ki pulit ki la ïathuh ba u John R Marak na ka shnong Mendal (NGH) u la phah ka jingujor ba ha ka 9 tarik mynta u bnai ba u la shah tuh ka thuk thuk jong u kaba don u nombar ML-07B-7854.
Na ka liang jong ki pulit ki la ïathuh ba u Suraj Kr Sharma na Bamunipanikhown, Assam u la phah ka jingujor ba ha ka step jong ka 10 tarik mynta u bnai, la shem ba ka Bolero Pick-up kaba don u nombar ML-07A-7501 ka la jah na ka ïing jong u bad kane ka jaka ka dei kaba dang hab ha Mendipathar PS (NGH).
