Shillong, Jymmang 15 : U MLA ka Shillong South, Bah Sanbor Shullai ha ka sngi Palei u la plie paidbah ïa ka police booth kaba la phah shna kyrpang na ka bynta ki pulit pynïaid kali ha Red Cross kaba hap ha Laban Police Station.
Ïa kane ka police booth u Bah Sanbor ula plie bad aiti ha u Superintendent of Police (Traffic), u K Prasad ryngkat ka jingdonlang u Addl. SP nalor ki heh pulit jong ka Laban PS, Rangbah Shnong bad kumjuh ki nongïalam na ka MCIC bad kiwei kiwei.
U Bah Sanbor u la ïathuh ba ka jingphah shna jong u ïa ka police booth kadei namar ka jingisynei ïa ki pulit pynïaid kali ha ka por slap namar kim don kano kano ka jaka ba kin shong jahthait, kin buh ïa ki jain lane ban shongbam.
“Kumta nga la mang 1,30,000 tyngka na ka Discretionary Grant ban phah shna ïa kane,” u la ong da kaba pynpaw ïa ka jingkyrmen ba ïa kane ka sienjam la kyrshan lang ruh da ki nongïalam shnong.
Hadien kane, u Bah Sanbor u la plie paidbah ruh ïa ka jaka leit bar kaba la shna lyngba ka skim Swacch Bharat Mission kaba la pynïoh na ka Shillong Municipal Board ha ka jingmang kaba 5 lak tyngka khnang ban wallam ïa ka sawdong sawkun kaba khuid ba suba ha katei ka jaka.
