Shillong, Lber 01: Ka Meghalaya Clean and Green Organization kaba dei kawei na ka Seng ieid Mariang hapoh ka jylla Meghalaya, ka kyntu ïa ki paidbah nong Shong shnong ka jylla Meghalaya baroh ba kin husiar haka ïaid ka ïeng ban nym bret kulmar ïa ki sikret lane duma haba ki ïaid na ki jaka khlaw ïoh kan wanrah ïa ki jing pluh ding.
Ka kyrpad ruh ba kin long kiba stad ban pyn neh pynsah ïa ka Mariang bad ki sawdong sawkun jong ka, ban nym ïa thang khlaw kulmar namar kan wanrah ïa ka jing jot jong ki khlaw ki btap dieng ki siej bad ki mrad bad ki sim.
Ka Seng ka ong ba ki briew ki la im ha kane ka juk ba ka jingkylla jong ka Mariang ka stet bha, (Global Warming And Climate Changebad lada ki paidbah kim kheiñ kor ïaka mariang kan don ka jingduh ïa ki khlaw bad ki mrad kan poi ka por u khunbynriew unsa duh jaid na kane ka sla pyrthei, kumba ka jia ïa ki mrad Dinasour kiba la duh jaid na kane ka sla pyrthei bad sah satang ki jingkynmaw ha ki kot pule bad jingïathuh khana pateng.
Kane ka aiom ka dei ka aiom kaba tyrkhong bad jur bha ka lyer, kumta ka Seng ka kyrpad ruh ïa kito ki briew kiba im da ka rep Jhum ba kin sngewbha ban phikir haba ki thang ding ha ki jaka rep jong ki.
Ka Seng ka kyrpad ia ki Fire and Emergency Service ba kin sngewbha ban long kiba peitngor ïa ki jing pluh khlaw pluh ding ha ki lum bad ki khlaw,lada don ba ujorne ym don ba ujor ruh kidei ban mareh wut wut sha ki jaka pluh ding tang shu ïohi ne ïoh jingtip.
Ka Seng ka kyntu ruh ïa ka sorkar ba kan shim khia ban pynlong da ki awareness program ban pyn sngewthuh ïa ki paidbah halor ki jing kordor ka mariang bad ban kiar na ki jing thang khlaw.
Kane ka long katkum ka kyrwoh ba la phah da u Samla S Nongkhlaw Organising Secretary Meghalaya Clean and Green Organization, cum President Meghalaya Clean and Green Organization Upper Shillong Unit.
