Shillong, Lber 01: Ka Khasi Hills Autonomous District Council (KHADC) hz ka sngi Balang ka la mynjur ïa ka mang tyngka ba kot 46.27 klur tyngka na bynta lai bnai kaban treikam naduh ka 1 tarik Ïaiong haduh 20 tarik Jylliew 2023.
Ïa kane ka mang tyngka la mynjur hapoh ka ïngdorbar thaw aiñ jong ka KHADC bad kane ka mang tyngka kaba T.46.27 klur kadei tang naka bynta lai bnai namar bun ki daw ka district council kam lah ban wanrah ïa ka mang tyngka ba pura na ka bynta u snem 2023-2024.
Haba wanrah ïa kane ka mang tyngka, u Chief Executive Member (CEM) ka KHADC u Bah Titosstarwell Chyne u la pyntip ba ka mang tyngka kaba T.46,27,16,190 kan treikam naduh 1 tarik Iaiong haduh 20 tarik Jylliew 2023.
U Bah Titos u la pyntip ha ka ïingdorbar ba ïa ka mang tyngka ba pura jong u snem 2023-2024 yn sa shim biang ha kawei pat ka sien shong dorbar jong ka konsil.
U la ong ba kane ka mang tyngka ba tang lai bnai kan ailad ïa ki dkhot ban pynbit pynbiang ïa ki kot ki sla haba ïadei bad ka jingpynlut bad kumjuh ruh kane kan plie lad ban pynbit pynbiang ia ki jingdonkam khamtam haba ïadei bad ka jingsiew tulop sha ki dkhot, ki officers bad ki nongtrei ka KHADC nalor ka jingsiew ïa ki bai bam tymmen sha kito kiba la shong thait.
U Bah Titos u la pyntip ba kane ka mang tyngka ba lai bnai la kynthup lang ïa ka jingpynlut na ka bynta ki kam pynroi kaba ka District Council ka la ioh na ka 15th Finance Commission bad ïa kane ka mang tyngka kaba mynta la leh namar ka CAG ka dang lum jingkheiñ haba ïadei bad ka jingpynlut ka Council.
“Khang ba ki ophisar ka konsil kin ioh por ban pynbit pynbiang ïa ki jingdonkam jong ka CAG kaba dang lum jingkheiñ haba ïadei bad ka jingpynlut ka District Council bad ki don bun ruh ki MDC kiba iakhun ïa ka ilekshon MLA 2023 bad hadien kine baroh ki ophisar ruh kin sa lah ban pynbiang da ka mang tyngka ba pura” ong u Bah Titos.
Haba ïadei bad ka mang tyngka ba 46.27 klur, la mang 9,29,73,230 tyngka sha ka General Administration Department, 15,37,630 tyngka sha ka Law Department, 2,11,70,910 tyngka sha ka Revenue Budget & Finance Department, 2,38,94.710 tyngka sha ka Forest Administration Department, 1,45,17,810 tyngka sha ka Administration of Justice & Judicial Department, 1,86,66,370 tyngka na ka bynta ka Legislative Department, 3,40,370 tyngka na bynta ka Education Department, 27,53,18,430 tyngka sha ka Civil Works & Development Department bad 1,42,96,730 sha ka tnat Enforcement Scheme ban ïada ïa jaka riewlum ne Tribal Land.
