Shillong, Jymmang 26 : Donkam ka jingïatrei lang jong baroh ki paid nongrep ha ka jylla ban pynduna shuh shuh ïa ka jingai dawai sboh ha ka jylla ong u Director ka ICAR Research Complex kane ka thaiñ u Dr G Kadirvel.
U la ong hooid lada ïa nujor bad kiwei kiwei ki jylla hapoh ka ri ka jingpyndonkam sboh dawai ha Meghalaya ka dang duna bha hynrei donkam ban pyrkhat jngai pat.
“Wat la ka jingpyndonkam sboh dawai ha Meghalaya ka dang duna bha haba ïanujor bad kiwei ki jylla hynrei ka long kaba donkam pat ban shim khia ïa kane ka kam ban dang ïai pynduna ïa ka jingpyndonkam sboh dawai “ ong u Dr Kadirvel.
U kyntu jur ban pynsngewthuh ïa ki nongpyndonkam , ki nongdie bad khamtam ki nongrep halor ka rukom ai sboh dawai khnang ba ka khyndew kan ym shah ktah bad ba kan long kaba koit ba khiah bad ka donkam ruh ban don da ki jingïalang ban pyrkhat ïa ki polisi ban pyntreikam hapoh ka jylla.
Ka jingïalang halor ka “ Current Status of Fertilizer Usage in Agriculture …… bad kumno ban pynduna ka jingpyndonkam ha Meghalaya ka la wanrah lang ïa baroh ki tnad ba don jingïadei bad ka rep ka riang, ki ophisar, ki nongdie dawai spoh, KVK, FPO bad ki Nongrep.
U Dr BP Sing u khlieh jongka BTAC u la ong kane ka jingïamir jngmut ka long ban tip kumno ka jingpyndonkam sboh dawai ha ka jylla bad kiwei ki lad ban pynduna ïa kane ka jingpyndonkam.
Na ka liang u Director ka ATARI u Dr Mohanty u la ai jingmut ban pyndonkam da ka sboh kaba shna na ki jingthung jingtep hi ne na ki niut ki nier.
