Ïeng ki streetlight ha Nongpoh bad kiwei ki jaka ha Ri-Bhoi, ki mat dawa ka KSU, ai jingïaroh ïa u DC

Nongpoh, Jymmang 26: Ka seng Khasi Student Union, North Khasi Hills District mynta ka sngi kala leit ban ïakynduh ïa u Abhilash Baranwal Deputy Commissioner ka Ri-Bhoi District ban ïakren bad buddien shibun ki kam pynroi haka district kiba ka seng kala buh kum ki mat dawa haki snem bala leit noh bad khamtam ka jingurlong ka jingpynieng ïa ki streetlight ha shilynter u surok NH-6 khamtam haki jaka ba long sor kum ka Byrnihat, Nongpoh, Umsning bad kumta ter ter bad ruh ka jingsdang ban tei ïaki foot overbridge.
Haba kren sha ki lad pathai khubor na ka liang u Bah Ferdinald Kharkamni President ka KSU NKHD haka jingdonlang u Samla James Hitler Mawphniang Secretary ryngkat ki dkhot u la ong ba ngi iohi ïaka jingshimkhia u DC bad naduh ba plie ïaka toll gate ha Pahammawleiñ 20 mer ka seng kala ai jingmut ban buh da ki jingshai ha surok namar ka jingdum palat, nangta ki foot overbridge, ban pynbha ïaki thliew ki syar naka bynta ka jingshngaiñ ki paidbah, bad mynta ka kam kala ïaid shaid shaid bad ha katei ka sngi ha kaba ïadei bad ki street light la ioh ruh ban ïakren ba naka liang ki shnong ki hap ban peit ïaka jinglut jingsep ha kaba ïadei bad ki bill light hynrei ïa mynta hi ka NHAI ka dei ban bei ïaka jinglut katba ka 20 snem kumba la ïakut kam pat poi shuwa ba kin pynphai biang sha ka sorkar jylla.
Kumba la pynbeit naka liang ka seng kan sa buddien biang bad u DC ba thymmai u ban sa wan ban shimti ïaka kam ha Ri-Bhoi ha kaba ïadei bad k Foot Overbridge namar ki don ki wire jong ka tnad MeECL kba ïa tyngkhuh bad kynduh jingeh bad lada pynkynriah kan sa bun ka jinglut, kumta naka liang ka seng kala kyrpad ba dei ban buh da ka jingjurip lang da ka ophis u DC bad ka seng ban pynbeit ïaki jinglut jingsep.
Kum ka seng ka ai ka jingïaroh ïa u DC ba dei namar ka jingshimkhia jong u kine ki project mynta kila ïaid shakhmat kaba la pynitynnad bad lada mih sa kine ki overbridge kan wanrah shuh shuh ka jingitynnad bad ka jingmyntoi ïaki paidbah nongleit nongwan.
Ha kane kajuh ka sngi naka liang ka KSU kala pynkup burom ruh bad ai ka jingïaroh ïaki kam bad jingshakri u Abhilash Baranwal kum u DC u la leh naka bynta ka dong Ri-Bhoi shuwa ba un mih noh na kane ka district ban leit shimti pat kum u DC ka East Khasi Hills.