Hiar u MLA Mawkyrwat bad ïakynduh ïa ki lanot shlei um ha Pahamlang

Nongpoh, Naitung 28: Hadien ba ki longïing kiba shah ktah na ka jingshlei um ha shnong Pahamlang 17 Mer, ryngkat ki nongïalam ka seng Ri-Bhoi People’s Council dang shen ki la leit ban ujor bad aiti da ka dorkhas sha u Deputy Commissioner ka Ri-Bhoi District, ban dawa ïaki lad jingïarap bad dei ruh ban jurip ïa katei ka jaka kaba la long trai da u MLA Mawkyrwat ha kaba kala don ruh ka jingkynnoh ba dei ka jingtih khyndew kaba la kah ïaka lynti ïaid jong ka um, u Bah Renikton Lyngdoh Tongkhar MLA ka Mawkyrwat uba dei ruh u trai jong ka jaka mynta ka sngi u la leit ban jurip ïa katei ka jaka bad ban ïakren paidbah bad ki nongshong shnong halor ka jingshah kynnoh ba ka jingpyntrei ha ka jaka jong u ka la pynlong ïa ka jingshlei um kaba la ktah ïa bun tylli ki longïing.
Ha katei ka jingjurip la synran lang ïa u da ki ophisar na ki bor district ka Ri-Bhoi, ki heh ophisar na ka tnat PWD, u Rangbah Shnong bad ki nongshong shnong ka Pahamlang.
Haba kren sha ki paidbah, u Bah Renikton u la kyntait ïa ka jingkynnoh ba ka jingpyntrei ha ka jaka jong u ka dei ka dawbah jong ka jingshlei um. U la ong ba ki nongshong shnong hi ki tip bha ba haduh mynta um pat sdang satia ban pyntrei ïa katei ka jaka, namar ba u dang shu dep thied ïa ka na kiwei pat.
U la pynshai ruh ba mar ïa dep thied ïa katei ka jaka, u la shim ïa ka sienjam ban pynbha ïa ka lynti jingïaid ka um bad ban shna ïa ka nala, khnang ba ka um kan ïaid bad kan ym wanrah jingeh ïa ki paidbah. Katkum ka jingïathuh jong u, u la pynlut da ki phew lak tyngka tang na ka bynta ban pynbeit ïa ka rukom ïaid ka um bad ban buh ïa ki Hume pipe namar ka jaka tuid ka um kami oh jaaka shuh namar ka um ka tuid tang na katei ka jak aba tih thymmai, katba ka thliew ba ju tuid ka um la kaah noh da ki khyndew.
“Ki paidbah ki tip bha ba mynshwa kane ka dei ka jaka ba madan. Hynrei nga la mynjur ban ai bynta na ka jaka jong nga ban shna ïa ka lynti jingïaid ka um bad pynlong kum ka wah, watla kan wanrah jingduhnong ïa nga, hynrei nga leh ïa kata tang ban lait jynjar ki paidbah” la ong u Bah Renikton. U la ong ruh ba ka kam shna ïa ka nala bad ka jingthep Hume Pipe ka dang ïaid shakhmat bad ka um ruh ka la sdang ban ïaid lyngba katei ka lynti. Hynrei u la kyntu ïa ki nongshong shnong ba kin long kiba phikir bha, namar lada jia ba wan ther biang u lapbah katba ka jingpyntrei kam pat dep pura, ka lah ban dang wanrah biang ïa ka jingshlei um.