Ban ïada na ka jingwan lynshop mariang pynlong prokram ka NDRF ha Kiang Nangbah College

Jowai, Naitung 27: Na ka bynta ban long kiba la pynkhreh lada wan ki jingjia ba sngewsih na ka jingwan lyngshop ki bor mariang ha ki snong ki thaw, na ka liang ka 1st BN, National Disaster Response Force (NDRF), Guwahati ryngkat ka jingïatreilang bad ka Disaster Management Authority (DDMA), Jowai bad kiwei de ki tnad ha kane ka 27 tarik kila pynlong ïa ka prokram Disaster Management Awareness and Familiarization Session ha Kiang Nangbah Government College, Jowai.
Kiba la wan ïashim bynta da ki samla pule ba kynthup ïa ki volunteer jong ka NSS, ki Bharat Scouts and Guides, ki cadet jong ka NCC bad ki ophisar Sorkar na ki tnad bapher bapher, ban kyntiew ïa ki jingtip halor ki lad jingïada na ki jingma lada wan jia ki jingjia ba sngewsih.
Ha kane ka sngi na ka liang u ma Darimi Lyngdoh, District Disaster Management Officer, Jowai ula ong ïa kane ka prokram hapoh ka District la sdang naduh ka taïew ba la dep da ka jingthmu ban wanrah ïa ka jingpynsngewthuh ha ki samla pule bad ki nongtrei sorkar lada wan lynshop ki bor mariang ha kino kino ki por.
Na ka liang jong u, ula ïathuh ruh la dep ban pynlong ruh ïa ki prokram ai jinghikai ha ki skul kiba don ha kylleng ka sor Jowai bad kane ka prokram kan dang bteng ban pynlong ha Amlarem, Thadkaskeiñ bad Laskeiñ Block ha kine ki ar sngi ban wan
Kane ka prokram ba la hikai da ki briew ka NDRF ka la ïarap shibun ruh ïa ki nongshah hikai ba kin tip ban ai jingsumar naduh ka first aid, CPR, ki lad jingïarap ba kyrkieh ban pynlait im ïa kiba mynsaw da kaba pynkynriah sha ki jaka ba kham shngaiñ, nalor kiwei.