La nang ïaid shaid shaid ka jingpynrung kyrteng Aadhaar ïa ki nongshong shnong ha thaiñ Garo Hills

Shillong, Naitung 28: Ka bor pynïaid District jong ka South West Garo Hills ka la pynlong ïa ka prokram pynrung kyrteng kaba shi sngi na ka bynta u Aadhaar, jingkha bad jingïap bad kiwei kiwei ki rukom treikam ha kylleng kane ka distrik.
Ïa kane ka sienjam la pyntreikam hapoh ka Chief Minister’s Catalytic Fund na ka bynta ban pynurlong ïa ki jingtyngkai ba ïaineh. Ka thong jong ka, ka long ban wallam ïa ki shakri ba donkam halor ki syrnot pynshisha bad ki jingset kyrteng shajan ki paidbah, khamtam ïa kito kiba shong basah ha ki jaka ba kham pajih bad ki jaka bym pat biang ki lad ki lynti, ryngkat ka jingpynshisha ba ki nongïoh jingmyntoi kiba bit ki ïadei bad ki skim ka sorkar lyngba ka jingpynïasoh bad u Aadhaar.
Ïa ka thup pynrung kyrteng ba nyngkong la pynlong ha Nogorpara PHC ha ka sngi nyngkong, kaba la ïoh ïa ka jingkyrshan na u paidbah bad jan 1000 ngut ki briew ki la ïoh ïa kane ka lad ba la tyrwa hapoh kane ka camp.
Kane ka jingpynrung kyrteng ka la pynbit pynbiang ïa ki nongshong shnong ban pynïoh ïa ki kam kiba donkam ha kajuh ka jaka. Kine ki kynthup ïa ka ban registar ïa ki jingkha, jingïap bad ka jingïoh ïa ki syrnot Non-Availability Certificate (NAC). Nangta, ka kynthup ruh ïa ka ban pynïasoh bad pynbiang ïa ka Aadhaar bad ki dkhot longïing na ka bynta ki skhim kiba ïadei bad ka bha ka miat u paidbah.
Kine ki camp ki long ruh kum ka rynsan ban pynsngewthuh ïa ki paidbah halor ka jingdonkam ban registar ïa ki jingkha bad jingïap ha ka por kaba biang. La pynsngewthuh ruh ïa ka jingdonkam ban pynïasoh ïa ki record bad ka Aadhaar khnang ban ïoh ïa ki jingshakri paidbah bad ki jingmyntoi na ki skhim bapher bapher.
Kum kane kajuh ka jingpynrung kyrteng, la pynlong ruh ha Betasing PHC ha ka 31 tarik, Naitung bad ha Garobadha PHC ha ka 14 tarik, Nailar. Na ka liang ka District Administration ka la kyrpad ïa ki nongshong shnong jong kato ka shnong ba kin shim ïa kane ka lad bad leit pynrung kyrteng ïalade ha ki camp ba don hajan ha ka tarik ba la buh.
Ki nongshong shnong, khamtam kito ki bym pat pyndep ïa ka jingpynrung kyrteng ïa ki jingkha ne jingïap hapoh ki longing longsem, kito ki bym pat shon Aadhaar, ne ki bym pat pynïasoh ïa ka Aadhaar bad ki skhim jingïarap ka sorkar, ki dei ban wanrah bad ki ki kot ki sla ki ba biang khnang ban long ka jingtreikam kaba tista bad kaba ïaid beit.
Ki ophisar ki la pyntip ba kane ka sienjam ka long shi bynta na ka jingpyrshang kaba ryntih ka distrik ban pynkhlaiñ ïa ki rukom pynrung kyrteng shnong, ban pynïar ïa ka jingshakri paidbah bad ban wanrah ïa ka jingïashon bynta kaba kham bun hapoh ki prokram jingïarap ka sorkar.
Ryngkat ka jingrah ïa kine ki jingshakri shakhmat ki paidbah, ka bor pynïaid distrik ka thmu ban pynthikna ba yn nym don uwei ruh u nongshong shnong u ban shah iehnoh na kine ki hok kiba ïadei bad ka jingpynithuh kyrteng, ka jingpynrung kyrteng bad ki jingmyntoi na ki skhim ba pynïoh jingmyntoi.