Nongstoiñ, Naitung 28: Ka Great Mountain Trust (GMT) kaba dei kawei na ki seng kaba don ïa ka thong ban ïaleh ban pynneh pynsah ïa ka jingitynnad ka mei mariang, naduh ki lum ki wah bad ki dohum dohwah bad kiwei kiwei, ha ka sngi hatmajai ka la pynlong ïa ka jingai jinghikai shaphang kumno ban leh khuid, da kaba sdang naduh ki ïing ki sem khnang ba ki wah kiba lah ban ai jingmyntoi kin ym long lehnohei lane kylla jaboh.
Ha ka jingïalang kaba la pynlong ha Phresilla Byrsat Complex New Nongstoiñ, u bah Gabriel Wahlang MLA ka Nongstoiñ u la long kum u kongsan ryngkat ka jingïasynran lang ka kong N.E. Wanñiang MCS Assistant Commissioner West Khasi Hillls District kum ka symbud kongsan, bah KS Kharshiïing na ka tnad Soil and Water Conservation Department West Khasi Hills Nongstoiñ, ki ophisar na kiwei kiwei ki tnad ophis sorkar bapher bapher.
Ha katei ka jingïalang la pynlong ruh da ka jingïatai bniah shaphang kumno ban sumar ïa ka jingitynnad ka mei mariang, ha kaba naduh ki ophisar sorkar, ki nongsynshar shnong, ki khynnah skul bad kiwei kiwei ki la ïoh ban ïashimbynta ha ka ban ïathir jingmut haba ïadei bad ka jingïaleh ban sangeh na kaban pynjaboh, khamtam ïa ki ar tylli ki wah bah kiba don hapoh ka sor Nongstoiñ kiba kynthup ïa ka Wah Nonbah, bad ka wah Nondeiñ.
Ïa katei ka seng la lamkhmat da u bah Rk Bijay Byrsat Shongknor bad Nongseng ka Great Mountaiñ Trust. La ong ruh ba ka seng ka la trei shitom bha ban wad bniah ïa ki lad ki lynti kumno ban pynkhuid ïa kitei ki wah. Nalorkata, ka seng ka la dep ruh wat ban test ïa ka um ha ki laboratory room ban lap la haduh katno kitei ki wah ki la jaboh.
U Bah Byrsat u la kren shai ruh halor ka jingdonkam jong baroh ki nongshong shnong, khamtam kiba hapoh ka New Nongstoiñ bad Upper New Nongstoiñ, ba kin long kiba smgewthuh ïa ka jingkordor jong kine ki wah. U la ong ba ka dei ka kamram jong uwei pa kawei napdeng ki nongshong shnong ban shim halade ïa ka kamram ban ïada na ka jingpynjaboh ïa kine ki wah.
U la ong ruh ba ka jingkhuid kaba neh shirta jong kine ki wah ba kongsan hapoh sor, kan long ka jakpoh ïa kiba bun kata lada ka jingkhuid jingsuba ka neh. Pynban lada la bret pathar bad pynjaboh ïa kine ki wah kan long pynban ka jingtim ïa ka pateng ki khun ki kti ban dang wan.
Katba na ka liang u Kongsan u la ai mynsiem bad kyrkhu kyrdoh ïa ki nongïalam jong ka Great Mountain Trust, bad kyrmen ruh ba kane ka seng ka ïai trei khambha shuh shuh na ka bynta ka bha ka miat jong ka thaiñ Nongstoiñ, khamtam eh kaba ïa dei bad kane ka jingthmu ba bha jong ki ban pynneh pynsah ïa kine ki ar tylli ki wah kiba don hapoh jong ka sor Nongstoiñ.
