Pynkynriah ka sorkar ïa ki nongdie madan ha Polo bad Jail Road ryngkat ka song pisa ba 20 hajar tyngka

Shillong, Naitung 28 : Ki nongdie madan na Polo bad Jail Road, ki la plie ïa ki dukan die mar jong ki na ka jaka shong die madan ba thymmai ha Shillong, kum shibynta jong ka jingpyrshang ka sorkar ban pynkynriah ïa ki nongdie madan hapoh ka Meghalaya Street Vendors Scheme 2023.
Ka Tnad Urban Affairs ka pyntip ba ki nongshong die madan kiba ju shong die ha Jail Road la pynkynriah noh sha ka jaka pynïeng kali ba don pyrshah ka SBI, katba kiba na Polo la pynkynriah sha jaka shong die madan hajan ka Matri Mandir.
Na ki 132 tylli ki dukan ha Matri Mandir, 70 tylli ki dei kiba la shong briew. Ha jaka pynïeng kali pyrshah ka SBI, 9 na ki 79 tylli ki dukan la shong. Sa 22 ngut ki nongshong dukan madan na Secretariat Hills bad IGP Junction yn sa pynkynriah ha ka 29 tarik Naitung.
Ka Tnad ka pyntip ba ïa kane ka kam la pyndep lyngba ka jingïasyllok bad khlem kano kano ka jingleh da ka bor.
Ban kyrshan ïa ki nongdie madan, ka Sorkar kan ai 20,000 tyngka ka song jingïarap ïa ki nongdie madan ba kynriah, kiba don ïa ka Certificate of Vending hapoh ka Chief Minister’s Urban Livelihood Grant.
Ka kynthup ia 10,000 tyngka ban siew noh bad 2,000 manla u bnai na ka bynta san bnai.
Haduh mynta, 65 tylli ki CoV lah dep ban ai hapoh ka SBI Zone bad 106 tylli ha Matri Mandir.
Ka Tnad ka pyntip ruh ba ka jingpynkynriah ïa ki nongdie madan ha Laitumkhrah kan sdang naduh ka 17 tarik Nailar.