Hiar ka khaiï pateng ba khwan myntoi ïalade ki briew ba don ha ka bor : Ma AA Shullai
Jowai, Rymphang 15: U kyrtong ka TMC na ka 2-Jowai Constituency u ma Awhai Andrew Shullai ha ka jingkren jong u ha ka jingïalap Election ba la pynlong hynnin ka sngi 14 tarik ha Iawmusiang Stand Ummulong, ula pynsngew ba ka khaïi pateng mynta kala nanghiar bad nang hiran shaba palat bad kane ka jia dei na ka daw ka jingsynshar donbor jong ka sorkar ha ka jingdon kita ki High Level kiba la ïoh myntoi na u dewïong bad ïa ka pisa kaba dei ban poi sha ki paidbah kum ha ki ïew ha hat kala jah klep noh.
Haba phai sha ka jingïohkam jong ki Contractor, u ma Andrew ula ong mynshwa ki don da ki spah spah ngut ki Contractor ha ki tnad sorkar bapher bapher, hynrei mynta la don sa tang katto katne ngut bad kita ruh ki dei kiba don ha ka bor. Ka District Council kaba la duna ka jingïoh pisa da kaba ïoh 5 klur ha ka shi bnai bad shisnem 60 klur hynrei mynta ym tip shano ka pisa kala shu jah noh, kine baroh dei na ka rukom treikam jong kane ka sorkar hapoh kine ki san snem.
Kine ki briew kiba don ha ka saiñ hima sima mynta kila sdang ban wan tyrwa sa da ka pisa sha ki nongthep vote sha manla ki thliew ïing khnang ba kin poi biang sha ka bor. Hynrei ula pynsngew, katba ïa ki project kiba dang sahteng hapoh ka sor Jowai kum ka MCH, ka B.Ed, ka Iawmusiang bad kiwei de la shuh ieh sah khlem pyndep shuh.
U ma Andrew ula buh jylli ruh “Kumno ka lawei jong ki khun samla haba da ki spah tylli ki kam ba thylli ka sorkar kam shem la kwah ban thep nongtrei?”. Namarkata u la kyntu ïa ki paidbah jong ka 2-Jowai ban long kiba pyrkhat jngai na ka bynta ki khun ki kti jong ki bad u kyrpad ruh ïa ki ban jied ïa u ha kane ka kynti khnang ba un trei na ka bynta ki paidbah khnang ban wanrah ïa ka jingkylla hapoh ka Constituency bad ha ka jylla hi baroh kawei.
Ha kaba ïadei bad ka party TMC, u ma Andres ula ong ba ka TMC ka don ïa ki nongrim ban kdup lang ïa ki jait ñiam bapher bapher, kumjuh ki jaitbynriew rit paid.
Haba phai ha ki por ba la dep na ka liang u MP ka TMC hapoh Parliament ula kren shaphang ka jingdonkam jong ki nongshong shnong ka jylla kum ka ILP, ka jingpynrung ïa ka ktien Khasi ha ka khyrnit kaba Phra (8th Scheduled) jong ka riti synshar ka ri, nalor ba kane ka party ka peit ruh ïa ki kup shiliang ki sem shiliang, khamtam ïa ki longkmie da kaba ai jingïarap da ka pisa T.12 hajar shisnem.