Khliehriat, Rymphang 15 :Katkum ka ka jingbthah jong ka Election Commission jong ka Ri India (ECI), lyngba u District Election Officer ka East Jaiñtia Hills District, u pynshai ne pynbna paidbah sha baroh ki nongthep vote ha ka ba ïadei bad ka sngi thep vote ka ban long ha ka 27 tarik u rymphang 2013.
La ong ba baroh ki nongthep vote ha baroh ki constituency hapoh ka jylla Meghalaya, kin hap ban rah bad pyni ïa la ka jong ka EPIC na ka bynta ban pynithuh ïalade ha ki jaka thep vote (Polling Station) ha shwa ba kin thep ïa ka vote jong ki. Na ka bynta kito ki nongthep vote ki bym lah ban pyni ïa ka epic jong ki, ki dei ban rah da ki wei pat ki kot ki sla ba kin ban pynithuh ialade, kum ki Aadhar Card, MGNREGA Job Card, Passbook Bank lane Post Office ba don lang bad ka dur, ka Health Insurance Smart Card ba la ai da ka tnat ka trei ka ktah (Department of Labour), ka Driving License, PAN Card, Smart Card ba la ai da ka RGI hapoh ka NPR, Indian passport, ki Kot Pension bad ka dur, Ki Card pynithuh ïalade (ID Card) ba ai ha jaka trei ka sorkar pdeng/ Jylla/ PSU/ Public Limited Companies, Ki Card pynithuh ïalade (ID Card) ba la ai sha ki MP/MLA’s/ MDC’s, Unique Disability 10 (UDID) Card ba la ai da ka Ministry of Social Justice and Empowerment jong ka Sorkar India.
Shuh Shuh, lada don kino kino ki jing ïapher ki ba malu mala ha ki EPIC, kum kita dei ban kyntait haba u nongthep vote u lah ban pynshisha ïa ka ta. Kumjuh ruh lada don ki nongthep vote ba rah bad pyni da ki EPIC ba ki ïoh naki Electoral Registration Officer na kiwei pat ki Assembly Constituency, ïa kum kine ruh dei ban pdiang bad ai ïa ki ban thep vote lada ka kyrteng jong kum kine ki nongthep vote ka paw ha ki Electoral Roll jong ka Constituency ba ki thmu ban leit thep vote. Lada ym lah ban pyntikna ïa ka jingpynithuh, U/ Ka nongthep vote dei pat ban pynbiang da ki kot ba la kdew haneng.
Ki Nongthep Vote ba sah shabar ka Ri ki hap ban rah lang ban pyni ïa ki kot original Indian Passport jong ki.
Ban kham iarap pynkloi ne pynsted ïaka jingwad ïa ka jingkdew thup ne serial number jong ki nongthep vote ha ka Electoral Roll, ïa ki Voter Information slip dei ban ai san (5) sngi ha shwa ban poi ka sngi thep Vote da ka Office treikam jong u District Election Officer. Hynrei, ïa kine ki Voters Information Slip ym lah pat ban pyndonkam ïa ki da ki nongthep vote kum ki kot pynithuh ïalade ha ki jaka thep vote.
La pynshlur bad la kyntu ïa baroh ki nongthep vote ban ïa mih lut baroh ha ka ban ïa leit shimbynta ha ka jingiathep vote ha ka 27 tarik u bnai rymphang, 2023 kum ka dak ban pyndep ïa la ka jong ka hok bad ka kamram.
