Shillong, Rymphang 15 : U nongïalam ka TMC, Dr. Mukul Sangma ha ka sngi Balang u la kular ïa ki paidbah ba un ïakhun na ka bynta ka jaka kaba ki la shah knieh noh. Ïa kane u la kular ha ka jingïalang ïalap elekshon paidbah ha Resubelpara ha ryngkat ka jingdonlang u kyrtong ka party na katei ka thaiñ hi, u Rinaldo K Sangma nalor kiwei kiwei ki nongïalam ka party.
Shuh shuh u la ïai ban ruh ba ka Meghalaya TMC kan sa pyndam noh ïa ka soskular ïa pynbeit pud hapdeng ka Meghalaya bad Assam bad ruh ban pynïoh bïang ïa ka jaka jong ka B-Mahal na ka bynta ki paidbah.
“Nga kular ban pynïoh biang ïa ki jaka puta na Assam bad ka jaka jong ki B-Mahal kaba ki longshwa manshwa jongngi ki shong ki sah. Ngi tip ba kane ka sorkar ka la knieh noh ïa ka jaka hynrei ka kular ba ngan sa pynïoh biang hadien ba ngi la thaw ïa ka sorkar,” u la ong.
Utei u nongïalam ka Liang Pyrshah u la kynthoh ruh ïa ka sorkar MDA ba ïalam da ka NPP kaba la pynslem ban thungkam ïa ki nonghikai. “Ngin sa ai ïa ka hok sha ki nonghikai kiba la shah shet kylla bad kiba don mynta ha ka jingdum na ka daw ka jingleh jong kane ka sorkar. Nga kular ba ngin sa ai biang ïa ki, ka lad bad ngin pyndap lut ïa ki kam kiba thylli baroh. Nalorkata, ngin sa kyntiew ruh ïa ka tulop jong ki nonghikai bad ki nongtrei sorkar kloi lan.”
Shuh shuh u la ong ruh ba ha ka por jong u, u la kyntiew ïa ka tulop jong ki nongtrei sorkar ar sien ha ka shisnem katba kane ka sorkar pat kam shym la kyntiew satia wat tang shisien ruh ha ki san snem.
Da kaba kyntait pat ïa ka jingpynphriang khubor lamler ïa ka party, u kyrtong ka TMC na Resubelpara u Rinaldo u la ong, “Ka BJP bad TMC kin ym lah satia ban don lang namar ka TMC ka don la ki jong ki mat treikam kiba ïapher.
Utei u nongïalam u la kynthoh ruh ïa ka sorkar pdeng bad ka sorkar jylla kiba khlem lah satia ban pyntreikam ïa ka PM Kisan Scheme ha ka jylla. “Ïa ka skim PM Kisan la ai da ka sorkar pdeng bad kumta ka sorkar jylla kadei ban ai sha baroh ha Meghalaya hynrei kane ka sorkar jylla kam shym la sam ïa kitei ki jingïarap, pynban ki jer kyrteng pat kum ka skim FOCUS,” ong u Rinaldo K Sangma.
