Shillong, Rymphang, 15: Ka Meghalaya Pradesh Congress Committee (MPCC) ka la nang duh shuh shuh ïa ki nongïalam kiba hakhmat eh hadien ba ka Coordinator jong ka All India Congress Committee ka Mahila Congress ka Kong Susuki Pariat ka la mih noh na ka Seng Congress bad pynïasoh sha ka BJP ha ka jammiet sngi Balang.
Ïa ka Kong Susuki Pariat la pdiang sngewbha da u Spokesperson ka BJP u Bah M. Kharkrang uba long ruh u kyrtong ka BJP na ka North Shillong Constituency ha ka jingïalang kaba la long ha Wahthapbru, Shillong ha kaba la sakhi lang da u State Vice President ka BJP u Dipayan Charabarty bad ki nongïalam jong ka Mahila ka seng BJP na ka jylla Meghalaya bad na Assam.
Ka Kong Susuki Pariat ka la jaw ummat katba ka dang ïathuh ïa ka jingjia shaphang ka jingkhladnoh jong u kpa mynba ka jylla Meghalaya ka dang shah lynshop ha ka jingpang khlam COVID-19 haba ym don satia mano mano ruh ban ïarap ïa ka ing ka sem wat hapdeng ka jingkthang mynsiem.
“Ha ka por ba ngi la duh noh ïa i Pa, kata ka dei ka jingim kaba kthang tam ha ka jingim jong ngi, nga shu ïam hynrei ym don mano mano ruh ban wan ïarap lem ïa ngi,” ong ka Kong Pariat kaba la shahkri ïa ka seng Congress la 13 snem kynthih ryngkat ki ummat kiba tuid arliang ki ngab.
“Katba shaba ngi phai, ym don satia mano mano ruh ban wan ïarap ïa ngi, namarba ki ong ba i Pa jong ngi, i khlad na ka jingpang COVID-9. Nga sngewnguh shikatdei ei ïa i Bah Alexander L. Hek iba la kloi ban ïarap ïa ngi. I da ong ruh wan sha iing lada phi donkam eiei. Dei na kata ka daw kaba la pynlong ïa nga ban pynïasoh sha ka BJP,” ong ka Kong Pariat.
Shwa kane, ka la ïathuh ba ha ka por ba la wan lynshop ka jingpang COVID-19 ka la mih shakhmat bad la ki paralok ban ïarap ïa ki briew haba ki mad ïa ki donkam ba kyrkieh.
“Nga ieng hangne ym ban ïakhun ïa ka elekshon hynrei ba ngan shakri ïa ki paidbah. Nga kwah ban shakri,” ka la ong.
Haba kyntait ïa ka jingkynnoh ba ka jingpynïasoh sha ka BJP ka dei na ka daw ka jingshah thong pisa da ki klur, ka Kong Pariat u la ong, “nga tip ba ki briew kin sa kynnoh ïa nga ba ka la BJP ka la thong pisa da ki klur hynrei ngan ong, Em, u Bah Kharkrang um shym la thong pisa ïa nga hynrei da lade nga la tyrwa mon sngewbha.”
Ka la ong ruh ba ka jingpynïasoh jong ka sha ka BJP ka dei namarba ka kwah ban iohi ïa ki kam pynroi ha North Shillong Constituency.
U Bah M. Kharkrang haba kren haba pan ïa ka jingkyrshan jong ki paidbah nongshong shnong ka Wahthapbru, u la ong, “lada phi ai jingkyrshan ïa nga ha kane ka kynti, ngam kular, hynrei ngan pyni da ki kam ynda nga la jop bad ha u snem 2018 ngam donkam shuh ban wan biang ha kane ka shnong ban pan jingkyrshan hynrei ki kam ki jong nga kin sa kren kham jam.”
Haba kren halor ka jingbym iohkam iohkam jong ki samla kiba la nang la stad, u Bah Kharkrang u la kynthoh ïa ka jingkular jong ka NPP kaba bat ïa u lakam synshar ha ka jylla kaba la kular ban pynkha san lak tylli ki kam katba tang ïa ki post kiba lait thylli haduh hynñiew hajar thylli ha ki tnat treikam ka Sorkar ruh ym pat lah satia ban pyndap haduh mynta.
U la kynthoh ruh ïa ka jingbym biang ki tiar ai jingsumar ïa ki nongpang ha ki Hospital khamtam kum ka Ganesh Das Hospital.
“Lada 813 klur la pynlut ha ka jingpang khlam Covid hynrei haba nga kylli ïa kiba thiah pang ha hospital ki ong ba ki hap ban siew shi lak tang ka bai thiah pang namarba ka sorkar kam shym la ïarap eiei ruh em,” u la ong.
U la ïathuh ruh ki don kiba la khñium ba kim pat ïoh satia ïa ka pisa ba ka Sorkar ka la shim wai ïa ka kali jong ki bad don ruh kiba trei ha ki Covid Centre haduh mynta kim pat ïoh.
“Mano ba ïoh ïa kata ka pisa, dei tang kito kiba ai ïa ka Bill kaba 50 klur, 100 klur, kito ki ïoh lut, ki ai mynta ka Bill, lashai ka sngi ki la ïoh lut ïa ka pisa jong ki. Kata ka dei ka sorkar jong ngi. Ngam kwah ban kynthoh ïano ïano ruh hynrei ka kthang ka mynsiem lada nga ïohi kumne ban shu pynsyrwa ïa ka pisa kaba la ai na ka Sorkar Pdeng. Jin lada ki la pyntreikam hok ïa ka pisa, ka jylla jong ngi kan jin ym da long kumne,” kren bynñiaw u Bah Kharkrang.
U la ong ruh ïa ki paidbah ba kin peit nuksa na kiwei pat ki jylla kiba ka BJP ka la bat ïa u lakam synshar kiba la nang kiew irat shakhmat katba ka Meghalaya haduh mynta ka dang sah kumjuh.
Shwa ban pynwai ïa ka jingïalang, la pdiang burom ïa ki paralok jong ka Kong Susuki Pariat kiba la pynïasoh lang sha ka BJP ha kane ka sngi bad kynthup ruh ïa u nongïalam ka Voice of the People Party, North Shillong Constituency.
