Shillong, Rymphang, 15: Ka Nongaiktien jong ka All India Congress Committee ka Supriya Shrinate ha ka sngi Balang ka la ñiew ba ka jingkular jong ka BJP ban thaw ïa ka Special Task Force ban khlieh da u Nongbishar ba la shongthait jong ka Iingbishar Supreme Court na ka bynta ban tohkit ïa ki kam bamsap pyrshah ïa ka Meghalaya Democratic Alliance (MDA) ka dei tang ka “kam biria.”
“Kane ka dei ka kam biria namarba ka BJP ruh ka don bynta lang ha ka sorkar synrop. Ki paidbah ka Meghalaya, ki kwah ban tip-kaei kaba ki leh ha kine ki san snem?” la ong ka Supriya ha ka jingïakren bad ki lad pathai khubor haba kynthoh haloor ka Manifesto ba la pyllait paidbah da u National President ka BJP u JP Nadda.
“Ka BJP ka la sngewthuh ba kan ym jop satia ha Meghalaya, namarkata ka jingpynbna ban thaw ïa ka Special Task Force ka dei tang ka jingbyrngem ïa kiwei ki sengsaiñpyrthei kiba rit ba kin don lang ha kajuh ka thuup lane kin ngat ha ka jingshah buddien,” ka la ong.
Haba pynpaw ba ki arngut ki Myntri Sorkar jong ka BJP, u Bah AL Hek bad u Bah Sanbor Shullai-kiba don lang ha rynsan ha ka por ba la pyllait paidbah ïa ka manifesto, kane ka nongïalam jong ka AICC ka la ong, “hato ka BJP kan tohkit pyrshah ïa la ki jong ki dkhot ka Party kiba don bynta lang ha ka sorkar MDA?”
Da kaba pynpaw ba ka Manifesto jong ka BJP ka dei tang ka jingkular ba shu long tang ha rymmiang shyntur, ka la ong ba ki jingkular jong ka Congress ka la khlei ha ka Manifesto ki dei kiba paka, kiba don jingmut bad kiba lah ban pyntreikam.
Ka la maham ruh ba ka BJP ka dei ka jingma jong ki riewlum ka jylla Meghalaya haba kdew ïa ki jingshah thombor jong ki Ingmane ha ki bynta bapher bapher jong ka ri India, ka jingshah bom ïap jong kiba luilui tang halor ka jingkynnoh ba ki bam doh masi, ka jinglum jingkheiñ ïa ka jingdon ki Khristan bad ki Muslim ha Assam bad kiwei kiwei ki bynta, ka la ong, “ka Sixth Schedule jong ka riti synshar ka ri India kaba ai jingïada ïa ki riewlum ritpaid jong ka Meghalaya ruh ki don hapdeng ka jingma.”
Ka la ong ba ka jingdawa jong ka BJP ban wanrah ïa ka Uniform Civil Code ha baroh kawei ka ri ka pyni ba ka don ïa ka jingbun paid.
Ka la ong dang shen ka Janajati Dharma Sanskriti Suraksha Manch (ka kynhun ba la kyrshan da ka RSS) ka la dawa ban weng noh ïa ka Scheduled Tribe na ki Khristan. Kane ka long pyrshah ïa ka jingmut ba burom ïa ki ritpaid kiba dang shah kdup ha ka Scheduled Tribes ha North East, khamtam ki kynhun Khristan ha Meghalaya bad ha Nagaland. Ka la
“Ha Assam ka tnat Special Branch jong ka ophis u SP ka la phah ïa ki shithi sopsop sha baroh ki Superintendent of Police ha ki District ban pan jingtip halor ka jingdon jong ki iingmane bad ka jingpynkylla niam ha kane ka thaiñ. Kane ka dei ka jingpyrshang ban pynlong sohpdung ïa ki Khristan ha ka thaiñ,” ka la ong bad bynrap, “ka BJP ka ngeit ïa kawei ka India, ha kaba kan pyntreikam ïa ki saiñpyrkhat jong ki ha ka kolshor, ka ktien ka thylliej bad ka niam ha baroh kawei ka ri,” ka la ong.
Haba pynpaw ba ka Seng Congresa borabor ka ngeit ha ka jingïalong kawei, ka la ong, ‘ngi ngeit ïa ka jingïalong kawei jong kawei pa kawei ka jylla ha ka ri. Ngi burom ïa ka rukom im ha Meghalaya bad ha baroh kawei ka thaiñ shatei Lammihngi bad ngi kwah ïa ka jubab namarba kane kan ktah ïa ka jingim jong ngi. Hato ka BJP kan pyntreikam ïa ka Uniform Civil Code ha kane ka jylla Meghalaya?”
Kane ka nongïalam jong ka AICC ka la buh jingkylli shuh shuh ïa ka BJP halor ka jingtheh ïa ki song pynroi ha Meghalaya.
“Ka BJP ka la bat ïa ka bor synshar la phra snem ha Delh bad ka la long ruh ka dkhot jong ka sorkar synrop MDA. Kaei kaba ki la leh ïa ka jylla Meghalaya? Kiei ki kam pynroi ba ki la leh? Ka Shillong Airport haduh mynta ym pat lah ban pynher ïa ki liengsuiñ kiba heh. Ym pat don Airport lane National Highway ban pynïasoh sha Tura. Ka jingduna bording bad ka umbam umdih ka dang bteng haduh mynta,” ka la ong.
“Ki kam kiba ka BJP ka la leh ka long tang ban shu kdew kti ïa la ka jong ka sorkar ha Meghalaya. Hynnin u President ka BPJ u Mr. Nadda u la kynnoh ïa la ka jong ka Sorkar ba ka dei kaba bamsap. Kane ka dei ka sakhi kaba shai ba ka BJP bad ki paralok jong ka ki ïadon bynta lang ha ka bamsap bad kim shym la leh eiei ïa ki paidbah jong ka Meghalaya ha ki san snem ba la leit noh,” ka la ong.
