22tarik yn wan biang ka Mamata sha Meghalaya
Ka NPP kan phai thylli na rilum Garo bad u Conrad ruh un rem, ong u National GS ka TMC
Shillong, Rymphang 15 : U National General Secretary ka AITC, u Abhishek Banerjee ha ka sngi Balang u la kam ba ka NPP kan phai thylli na rilum Garo bad ba u Myntri Rangbah ka jylla, u Conrad K Sangma ruh un shah rem wat na ka constituency jong u.
“Nga la dep ong ba ka NPP kan phai thylli na rilum Garo kaba don baroh 24 tylli ki constituency. U Conrad ruh un sa shah rem na jaka la jong. Hynriew bnai mynshwa, ki ong ba ka Trinamool Congress kam don ktem satia hangne hynrei mynta pat peit ïa ki jingkren, jingkynthoh jong ki, phin ïohi ba ki sdang ïa ka sngi bad pynkut ïa ka da ka jingkynthah ïa ka TMC,” ong u Abishek haba kren ha ka jingïalang ha South Tura.
Nalorkata, u ong ruh ba ha ka por ba u ïaid lyngba ka ophis u District Collector, Treasury, office DIG bad Tura Police Station u ïohi ba kine jaka ki don ha ka jingdum namar bym don ki streetlight ha ki rud surok.
“Lada u Myntri Rangbah um lah ban wanrah jingshai ïa ka constituency lajong, kumno un wanrah kam pynroi ïa ka jylla?” u la kylli.
Da kaba kynthoh naduh ki hospital, ki skul bad College, u Abhishek u la ong ruh, “Ka Shillong Medical College ka don tang ha ki kot sada bad ka Tura Medical College ruh ka neh kumjuh. Ka Bengal ka don haduh 23 tylli ki medical college ha kaba 16 tylli ki dei ki medical college jong ka sorkar bad kiba tam dei jong ki riewshimet. Ka Bengal ka don ruh 23 tylli ki distrik. Kumta kam dei ïa ka Meghalaya ban don 12 tylli ki college na bynta ki 12 tylli ki distrik? Hynrei hangne ym pat don tang kawei ruh ka medical college.”
Shuh shuh u ong ruh ba mynta la ïaid lai bnai ka jingjia shah siat ha Mukroh hynrei haduh mynta ym pat don ba leh ei ei ïa kito kiba donkti siat ïa kitei ki briew kiba lui lui.
Ha kajuh ka por u ong ruh ba ki samla kim don kam don jam, ki hospital kim don doktor, ki skulbah kim don ïa ki nonghikai bad ka jylla kam don ïa ki surok.
Na ka liang utei u heh ka TMC u la pyntip ruh ba ka Mamata kan sa wan biang sha Meghalaya ha ka 22tarik mynta u bnai bad ka la pyntip ruh ba kan ym ïakhun tyngeh na ka bynta ka roi ka pa jong ka Meghalaya.