Mih ki nongkyrshan u Bah Shangpliang ban kyrshan ïa u kyrtong ka NPP ha Mawsynram

0

Shillong, Rymphang 15: Ki nongïalam bad nongkyrshan barim u Bah Himalaya Muktan Shangpliang ha Mawsynram, ha ka khyllipmat kaba khatduh ki la weng noh ïa ka jingkyrshan ïa u kyrtong ka BJP uba dei ruh u MLA barim katei ka constituency, bad ki la rai ban ai jingkyrshan noh ïa u kyrtong ka National People’s Party (NPP) u Bah Alvin K Sawkmie uba dei ruh u MDC ka thain.
U Bah James Kharbani uba dei u nongïalam katei ka kynhun na ka area Sawsymper u la ong ba ki don kumba 200 ngut ki nongtrei bad nongkyrshan ba radbah jong u Bah HM Shangpliang kiba la mih noh ban don noh bad ka NPP.
U la ong ba ka jingweng noh na ka jingkyrshan ïa u Bah Shangpliang kam dei satia ba ki don daw ïa u shimet, hynrei dei namar ba une u rangbah uba la hiar shuki na ka kam MLA um don satia ïa ka nongrim bad u la phet na kawei ka party sha kawei pat ka party.
U Bah HM Shangpliang udei u MLA ba la jop na ka seng Congress ha u snem 2018, hynrei ryngkat bad ki 12 ngut u la mih noh na ka Congress ban rung pat sha ka AITC ha u snem Naiwieng jong u snem 2021, bad khyndiat bnai shwa ka election u la mih noh na ka TMC da kaba hiar shuki syndon kum u MLA ban pynïasoh pat sha ka BJP ban ïakhun ïa ka election 2023.
“Ha kato ka por ngi la ïamih lang na ka Congress ban don ha ka TMC, hynrei hadien ngi ïohi ba une u rangbah u la leit ban ïasyllok bad ka UDP, bad namar ba um shym la ïoh ïa ka ticket u la leit ban pynïasoh noh bad ka BJP,” la ong u Bah Kharbani.
U la ong shuh shuh ba kum ka kynshun kam sngewïahap satia ïa kane ka rukom pyrkhat jong u Bah HM Shangpliang kaba la pynlong ïa ki ban mih noh bad ban kyrshan noh ïa u kyrtong ka seng NPP.

Leave A Reply

Your email address will not be published.