Hadien ka 2 tarik ka UDP kam dei shuh ban dang ïatrei bad ka NPP: Process

Shillong, Rymphang 15 : U MLA ba rim ka Mawlai bad u kyrtong ka UDP na ka Mawlai Constituency u bah P.T Sawkmie u la ong ba ka UDP kam dei shuh ban dang ïatrei lang bad ka NPP hadien ka 2 tarik namar ba la kren beiñ bad kynthoh palat u National Vice President bad Symbud Myntri Rangbah ka jylla ïa u kyrtong ka UDP ha Sohiong Constituency u bah HDR Lyngdoh ha ka jngïalang ba la long dang shen ha Rangshken.
U bah P.T Sawkmie haba kren haka jingïalang paidbah kaba la pynlong ha Mawiongrim ha ka 14 tarik mynta u bnai u la ong “ Ka jingkren beiñ ïa u kyrtong ka UDP ka dei ka jingkren beiñ ïa ka party bad ka jingong ba ki party kin sa ïa wan pan lyngknot na ka NPP ha ka janmiet 2 tarik ka dei ka jingñiew beiñ ïa ka UDP kumta na ka liang jong ngi ngim dei shuh ban dang ïatrei lang bad ka NPP hadien ka 2 tarik” ong u bah Sawkmie.
U la ong shuh shuh haba ïakren bad u nongthoh khubor ba u bah Prestone u la klet ban burom ïa ka UDP kaba la ïatrei lang san snem lynter ban pynskhem ïa ka sorkar MDA haduh ba kut ka san snem hynrei mynta pat u kren beiñ bad peit poh ïaka UDP da kaba ong ba khlem pep ha ka janmiet 2 tarik kin sa wan pan lyngknot na ka NPP kane ka dei ka jingkren beiñ bad peit poh ïa ki party kiba la ïatrei lang ha kine ki san snem kiba la leit noh. U la ong ki paidbah kin sa ai la ka bainong jongki ïa ka NPP.