Shillong, Rymphang 15 : Ka jingpyntreikam ïa ka Inner Line Permit (ILP) kan ktah ïaka kam jngohkai ïaka jylla, ong u National Secretary ka BJP u Rituraj Sinha haba jubab ïa ka jingkylli balei ka BJP ka sngap jar ïa ka mat jingdawa ILP haka Election Manifesto ka jong ka.
“Ka ILP kadei ka mat kaba donkam ban ïatai bha bad baroh kiba ïadonbynta. Ngi ngeit skhem ba ka don ka daw kaba shongnia ba ki paidbah ki kwah ïaka ILP ha ka jylla. Hynrei ngi ngeit ruh ba ka jingkiew jong ka jylla Meghalaya kan dei kaba wan lyngba ka kam jngohkai bad haka liang ka kam jngohkai, bun ki pynpaw ba ka ILP kan pyrkhing kaba lah ban wanrah ïaka jingduhnong haka liang ka kam jngohkai” ong u Sinha haba ïakren bad ki nongpathai khubor hadien bala dep pyllait ïaka Election Manifesto jong ka BJP hynne ka sngi.
Ula ong, kane ka mat ka donkam ban ïatai sani bha, kumta kin sa ïakren bad baroh kiba don bynta hadien ka elekshon bad u kyrmen skhem ba yn sa lah ban shim ïa ka rai kaba khatduh ha kaba ïadei bad ka ILP.
Lah ban ong, u MLA ka BJP na South Shillong u Bah Sanbor Shullai man la ka por u ju kren da kaba ong “Ai ïa ngi 31 ngut ki MLA, ngi ngin ai ïaka ILP” hynrei kaei kaba mih na ka jingkren jong u National Secretary ka BJP, ka paw kumba ka BJP ka ïaleh politik ha kaban pynslem ban pyntreikam ïaka ILP ha ka jylla Meghalaya. Lah ruh ban kdew ba ki MLA ka BJP kiba kynthup ïa u Bah Sanbor Shullai bad Bah AL Hek kidei kiwei napdeng ki 60 ngut ki MLA kiba la mynjur ïaka Resolution hapoh ka ïingdorbar thawaiñ ka jylla ban dawa naka sorkar pdeng ban pyntreikam noh ïaka ILP ha ka jylla Meghalaya.
