Nongpoh, Lber, 29: Ka kong Ampareen Lyngdoh kyrtong MP na ka party NPP mynta ka sngi ka la hiar sha ki thaiñ Mawhati ban sakhi hi dalade ïa ka jingeh jong ki paidbah sha katei ka thaiñ, ban ïakynduh ïa ki nongshong shnong ki nongïalam shnong, kaba dang donkam shibun ki kam pynroi ha katei ka thaiñ.
Ha kane ka jingleit hiar ka kong Ampareen sha ka thaiñ Mawhati la sdang naduh Umsiang ba la wan ban pynshngaiñ lang da ki nongïalam ka NPP Ri-Bhoi naduh u Bah Clement Mawlong President, Bah RM Mukhim Working President, Bah Shemphang Lyngdoh President NPP Mawhati Block bad kiwei kiwei ki nongïalam ba la wan pynïasoh sha ka party NPP.
Na ka liang ki nongïalam shnong ki ba la ioh lad ban kren ha kane ka sngi bad ka Kong Ampareen Lyngdoh ki la pynpaw ka jing sngew kmen ba dei tang ka kong Ampareen ka kyrtong ka nyngkong ka ba wan ban kynduh ïa ki paidbah kane ka thaiñ ban sngap ïa ki jingeh ki jong ki, khamtam ba kum ki paidbah ki la angnud palat ban ioh noh u surok ba paka nalor kiwei kiwei ki jingeh ba la pynsngew hakhmat jong ka bad kular ruh ban kyrshan ïa ka NPP da ka jingngeit skhem ba katei ka jingangnud jong ki kan urlong.
Haba kren sha ki paidbah na ka liang ka kong Ampareen ka la ong “Ngam dei tang ka nongïalam ha ka saiñ pyrthei hynrei nga dei ruh ka briew kaba trei ha ki kam treimon sngewbha bad kim don ki ban pynsngap ïa ki mat ki ba kongsan ki ban kyntiew ïa ka shnong ka thaw hynrei dei manga ka ban leh ïa kita, ka ban sngap ïa ki jingeh bad ka ban kyntiew ïa ki shnong ki thaw, nga trei da kaba buh ïa ka thong ha khmat”, ong ka kong Ampareen.
Ka la ong ruh, ngam tip ba phi la ju ïohi ne em ïa ki MP ha ka shnong jong phi, bad ki la don kiba ong ba kim pat ju iohi ïa ki MP ha ki sngi ki ba la leit, ka la pynpaw ruh ba ka don ïa ka jingthrang ban wan rah ïa ki jingkylla ha kine ki sngi ki ban wan, ka la kular ruh ba hadien ba la dep ka jingjied MP kan sa wan ban pynlut por bad ki nongshong shnong ban sngewthuh ïa ki jingeh jong ki briew shnong.
Shuh shuh ka la ong, ba kam dei kaba suk ban long kum ki nongïalam, hynrei ka la kular ban trei shitom ban wan rah ïa ki jingkylla ha katei ka thaiñ lyngba ki kam pynroi.
