Shillong, Lber, 29: Ka Executive Committee jong ka Dorbar Shnong bad kiba bun na ki paidbah nongshong shnong jong ka shnong Mawlai Syllaikariah, kaba hap hapoh ka Mawlai Constituency ki la rai ban ‘boycott’ ne ban ym ïashim bynta ha ka Elekshon Lok Sabha ka ban sa long ha ka 19 tarik, Ïaiong, 2024.
U Rangbah Shnong jong ka Mawlai Syllaikariah Bah C. Shullai ha ka jingïakren bad ki lad pathai khubor ha ka sngi Palei u la ïathuh ba ka jingshim rai jong ka Executive Committee jong ka Dorbar Shnong ka long halor ka jingleh mynthi jong ka Sorkar Meghalaya Democratic Alliance (MDA) ka bym shym la sngap ïa ka jingkyrpad ban maramot ïa ka surok PWD bad ïa ki surok shnong bad lynti ïaid kjat hapoh ka shnong ba ka tnat PHE ka la tih bad thep ïa ki pipe um mynta la shi snem tam.
U la ïathuh ba u Additional Chief Engineer jong ka tnat PHE u la wan peit hi dalade bad u la ong ba un sa bthah ïa u Kontraktor ban shna noh ïa ka surok bad ïa ki lynti shnong ba ladep tih hynrei la jan shi snem la shu ieh beit kumto.
“Dang lai bnai duna ngi ladep ai ïa ka jingthoh da ka kti ha ka Ophis PHE hynrei ka long kumba ibeiñ ïa ka shnong ba ki iehsat kumne,” la ïathuh u Bah Shullai.
“Ha u snem 2022 ka tnat PHE ka la wan buh ïa ki pipe um ban ai um ïa ka shnong lyngba ka Greater Shillong Water Supply Scheme (GSWSS). Ki la sdang ban tih ïa ka surok PWD, ïa ka surok shnong bad ïa ki lynti ïaid kjat naduh u snem 2022 hynrei ynda ladep tih, ki shu ieh noh kumto. Ha ka por ba slap, da ki bnai ngi (hap ban) ïaid nalor ka ktieh. Ha ka por ba rang u pumpum u rung sha ki ing jong ki briew,” ong u Bah Shullai.
U la ïathuh ba ka Executive Committee jong ka Dorbar Shnong ka la kyrpad ïa u Kontraktor ban tap bad ban leh bha noh bad shipor u la sdang ban leh bad u iehnoh bad u la sdang biang bad iehnoh. “Bun ki briew ki la mynsaw ha ka por ktieh ba slap. Ngi la kyrpad rit ïa u kontraktor hynrei u shu ong toto bad shu kut tang ka ktien,” la ong u Rangbah Shnong.
“Shipor u la sdang biang (ban trei) bad u la iehnoh shiteng. Ki don ki jaka kiba hap ngi ban shna hi da ka shnong bad ngi la hap ban pynlut da ka pisa shnong kumba 15 hajar haduh 20 hajar ba ki nongleit nongwan kin suk bad ki kali kin suk ïaid. Ki don ki jaka ba ki kali kim long shuh wat tang ban ïaid,” u la bynrap.
“U Kontraktor u la sdang trei bad la wan noh u slap u iehnoh. Shipor ngi la ïaishah namarba la hap u slap bad hadien kata ngi la kyrpad biang ban pyndep noh ïa ka kam ba ki paidbah kin suk ka leit ka wanm” u la ong shuh shuh.
Katkum ka jingïathuh jong u Rangbah Shnong, ki don leilei ki jaka ba ki briew haba ki ïaid mynmiet ki hap hapoh ki thliew. Ki la don arngut ki khynnah rit kiba hap ha kine ki thliew ki la mynsaw. I don iwei ruh i longkimie ba dang armet i la liat ha kane kajuh ka thliew bad i la mynsaw bad donbok ba dang don kiba lap ban sei ïa i na thliew.
“Ha ka khongdong ha lailad, kiba ñiah Scooty mynmiet ki ur, ki hap bad ki mynsaw bad bun ruh ki Scooty ki la sniew. Ngi la kyrpad ïa ka tnat PHE bad ngi la ai ruh da ka jingthoh hynrei kam leh eiei,” u la ong.
“Ngi la khot ïa u MLA u ong ba um lah ban leh eiei namarba ka dei ka kam jong ka PHE bad u MDC ruh kumjuh u ong ba dei ka kam jong ka PHE um lah ban leh eiei. Ngi la thoh da ka shithi sha ka tnat PHE ruh ki sngap manman khlem ai jubab haduh mynta,” u la bynrap.
U la ïathuh ba ha ka taiew ba ladep, kum u Rangbah Shnong u la phah noh da ka ujor lyngba ka Public Grievances Complaint sha u Myntri Rangbah ka Jylla hynrei mynta la jan shitaiew ym don satia ba jubab eiei halor kane ka jingai ujor.
“Ym don ba salia haba ngi shem jingeh. Ngim don lad shuh bad ka lad mynta ka long sa tang ba ngin ym ïashim bynta shuh ha ka elekshon Lok Sabha namarba ngim i myntoi. Ngi jied ïa ki nongmihkhmat ba kin dup lah ban ïarap ha ki kam pynroi bad ki jingeh ba ka shnong ka ud ka nam ban pynsngerw sha ka Sorkar hynrei ka shu kut noh kumto,” ong u Bah Shullai.
“Haba ngi jied ïa ki nongmihkhmat ngi mut ba kin mihkhmkat ïa ngi ki paidbah bad ban rah ïa ki jingeh jong ngi sha ka Sorkar pynban ngi sngew ba kam don jingmyntoi,” la kren diaw u Bah Shullai.
“Ka Executive Committee ka la rai ba ngin ym ïashim bynta ha ka elekshon Lok Sbha namarba ka Sorkar kam leh eiei. Kam don jingmyntoi lada ngi thep vote. Bun ki nongshong shnong ki ong ba ngin ym thep vote. Hynrei ka shong pat ka mon shimet jong kito kiba kwah ban thep vote hynrei kiba bun hi ki ong ban ym thep vote,”la ïathuh u Bah Shullai haba pyntip ïa ka jingshim rai jong ka Dorbar Shnong bad ki paidbah nongshong shnong.
“Ngin ym shim jingkitkhlieh shuh ban pynïaid beit ïaid ryntih ïa ki Polling Station bad ngin ieh beit ba ka Sorkar kan leh katba ka sngewbit hynrei ka shnong kam don jingkitkhlieh. Lada ka Sorkar kam ïohi bad kam shimkhia ïa kane ka jingeh kaba ngi la pynpaw shwa ka Elekshon MP ngi kum ka shnong ngin ym ïashim bynta eiei,” la bynrap shuh shuh u Bah Shullai.
Katkum ka jingïathuh jong u Rangbah Shnong, ki nongthep vote ha ka shnong Mawlai Syllaikariah ki don 1500 ngut bad lah ruh ban tam namarba ki don kiba dang shu pynrung kyrteng thymmai ha ka Electoral Roll.
