Nongstoiñ, Nailur 09 : Ka jingtrei shitom jong ki nongrep biskot ha kylleng ki shnong ha West bad Eastern West Khasi Hills, kam don jingmut shuh namar u biskot u dei u mar rep uba ka dor ïew dor hat kam ju neh satia. Mynta u snem lei lei ka jingduhnong jong ki nongrep biskot ka jur haduh katta katta, namar ka jingrang tyrkhong jong ka mariang ha ka aïom ba utei u jingthung u dang sdang khie lung namar ka jingbym ïoh ïa u slap ha ka por kaba biang ka jingsoh ruh ka duna bha.
U bah Cherfulman Sohshang na ka shnong Marngor haba ïakren bad u nongthohkhubor, u la ong ba ha ka por ba sdang ïoh kheit nyngkong, ka dor ka poi sanphew haduh hynriew phew tyngka shi kilo bad ki nongkhaïi biskotki ïaknieh bad ïakut lypa ïa ki nongrep ba kin thied kham heh dor ïa kiwei.
U la ong ruh ba ha kine ki sngi pat ki nongrep ki hap ban leit tyrwa hi ha ki nongkhaïi bad ka dor ruh ka la hiar sha ka ar tyngka shi kilo. Wat la katta ruh kim banse ban shu die lilam, namar ban bam ruh ym lah lait noh satang kito kiba ri bun ki sñiang te ka biang namar haduh u bnai Risaw u biksot u dang soh bha.
U bah Sohshang u la ong ruh ba ha ki snem ba la dep, ki bor pynïaid district jong ka West Khasi Hills ki la shimkhia bha ban kyntiew ïa ka rep biskot. Hynrei imat ka sorkar kam shym la ñiewkor ïa ka jingpynsngew jong ki bor distirct ka West Khasi Hills, ban thaw ki lad ki lynti kumno ban shalan ïa u biskot sha kiwei pat ki jylla, khnang ba ka ïoh ka kot bad ka kamai kajih jong ki nongrep kan kiew.
