Shillong, Nailur 09: Ka Hills Farmers Union (HFU) ka la pynpaw ka jingsngewkmen ban pyntip ba i Kong Angela Shangoi na ka Shnong Umyïap WKHD iba dei ruh i dkhot jong ka HFU Umyiap Circle i la ïoh ïa ka khusnam ” *Champion Women Farmers Change makers”Award.* Ïa kane ka Award i Kong Angela ila leit shim na New Delhi, na ka kti Hon’ble Union Minister Shivraj Singh Chouhan kaba un ai ïa kane ka Khusnam Lashai hynne ka sngi.
I kong Shangoi i la ïoh ka jingthuh ban ïoh ïa kane ka khusnam tang namar ka kam rep jong i. Ka Outlook Agritech Summit & Award 2024, kaba dei kawei na ka Media House kaba heh tam ha ka Ri, ka la jied ïa I kong Angela Shangoi tang marwei na ka jylla ban leit shim ïa kane ka Khusnam.
“Ka long ka burom kaba khraw ïa ngi baroh ki para nongrep ha ka jylla hi baroh kawei bad ngi kitbok kit rwiang ïa i kong Angela ba in poi suk bad phah ruh ha ryngkat ka duwai phirat,” ong ka HFU Central Body.
