Nongpoh, Nailur 09: U Deputy Commissioner ka Ri-Bhoi District u Abhilash Baranwal u la pyntip ba baroh ki samla kiba sah shipor shabar ban leit pule ne leit trei ba kin register ïalade ban pynsuk ïaka sorkar haka por ba don ka huri hura lane ka thma shabar ri naka bynta ba kin wanphai biang sha ka jylla.
Ha kaba ïadei bad kane, la kyrpad ia baroh ki samla pule kiba shong ba sah ha Ri-bhoi District bad kiba thmu ban leit shabar Ri na ka bynta ka kam ka jam lane ban pule puthi ne kito kiba la don lypa shabar Ri ban pynpoi ia ki jingtip ba bñiah kiba kynthup ïaka kyrteng, ka jaka sah kaba pura, ki jingtip shaphang ki kmie ki kpa, ki nongpeit, bad ka jaka kaba ki sah shabar ri lyngba ka online mode ha ka website: meghalayaone.gov.in.
Kane kan pynsuk ia ka sorkar ban pyntrei kam kloi ha ki por jingma kum ki thma, ki jingïakhih bad ki huri hura shabar ka Ri. Wat lada kane ka jingbthah kam dei kaba kongsan ne mandatory, la kyrpad ïa baroh ban register bad pynpoi ïa kine ki jingtip, bad ïaki kyrteng jong baroh yn buhrieh ym ban pynpaw paidbah namar katei ka jingbthah ban register ka dei tang haka por ba kyrkieh ne ba don ki thma.
