Batai pynshai ka DLSA West Khasi Hills halor ki aiñ jingïada ha ka imlang sahlang khamtam ïa ki khynnah

Nongstoiñ, Nailur 09 : Ka District Legal Services Authority (DLSA) West Khasi Hills ka la pynlong ïa ka Legal Awareness Program kaba kongsan mynta ka sngi ha Mawkhlam Nongpyndeng Dorbar Hall, ha kaba I Kong D.M. K.S. Shadap Chief Judicial Magistrate bad Secretary jong ka DLSA, I la long I Kongsan ha ka jingdon ryngkat lang jong u Dr. M. Nongrum, u S.I. B. Diengdoh, Rangbah Shnong, ki nonghikai, SHG, ki nongtrei ASHA, ki nongtrei Anganwadi bad ki khynnah skul na ki skul bapher bapher jong ka Shnong Mawkhlam Nongpyndeng.
Ka prokram ka thmu ban hikai bad pynsngewthuh ïa ki nongwan shaphang ki hok bad ki jingkitkhlieh kiba kongsan katkum ka aiñ.
Ki phang ba kongsan ba la ktah ki kynthup ïa ka aiñ ïada ïa ki khynnah na ki kam runar (POCSO), ka aiñ ïa ka jingbishar ïa ki khynnah rit, ki mat kiba ïadei bad ka jingshongkha khynnah rit, bad ka hok ban ïoh jinghikai.
Ha kane ka prokram ka ladon ruh ka jingïaphylliew jingmut hapdeng ki riew shemphang bad ki paidbah khang ban shai shuh shuh shaphang ki kyndon aiñ.
Kane ka sien jam ka pynpaw ïa ka jingangnud jong ka DLSA West Khasi Hills, ban ai bor ïa ka imlang sahlang lyngba ka jingstad aiñ bad ban pynthikna ba ki briew shimet na baroh ki rta, ki sngewthuh ïa ki hok jong ki bad ïa ki jingma kiba mih na ki jingpynkhein aiñ