Hapoh 15 sngi yn thaw ïa ki Regional Committee, kular ban pynbeit katkum ka rai ki paidbah

Nongpoh, Nailar 21: Tang hadien katto katne bnai ba ka sorkar Meghalaya bad Assam kala pyndep ïa ka jingpynbeit pud ha ka sien ba nyngkong, ha kaba 2 ngut ki Myntri Rangbah jong ka Jylla Meghalaya bad Assam kila dep ruh ban soi ïa ka MoU hakhmat u Amit Shah myntri ka kam pohïing ka Ri, ki 2 ngut ki myntri rangbah jong ka jylla Meghalaya bad Assam u Conrad Sangma bad Himanta Biswa Sharma mynta ka sngi ki la ïakynduh biang ha Secretariat ka Assam ha nongbah Guwahati ban sdang biang ban ïakren bad pynbeit na ka bynta ka jingpynbeit pud haka wat Ba Ar haki 6 tylli ki jaka kajia pud ka Meghalaya bad Assam ba kynthup ïaka Block I, Block II, Psiar, Khanduli, Borduar, Mawtamur kiba dei ki jaka ba hap ha ki 3 tylli ki district jong ka jylla.
Ïa katei ka jingïakynduh jong ki 2 ngut ki Myntri Rangbah ka jylla Meghalaya bad Assam mynta ka sngi la pynlong ha Janata Bhawan, Assam haka jingdonlang ruh ki Chief Secretary jong ki 2 jylla bad kiwei kiwei ki heh ophisar ha kaba la mynjur lang ban thaw noh biang ia ki Regional Committee hapoh 15 sngi.
Haba kren sha ki lad pathai khubor mynta ka sngi hadien ka jingïakynduh, ki 2 ngut ki myntri rangbah kila kular ruh ba kane ka jingpynbeit pud haka wat Ba Ar kan long kaba janai katkum ka rai bad ka jingmynjur ki paidbah kumba la ïakren naduh ba sdang, ha kaba shen yn sa thaw ruh ïaki Regional Committee ban sa khlieh da ki myntri ka jylla Meghalaya bad Assam bad shuwa ka jingpynbeit pud naka liang jong ki, kin sa leit ruh ban jurip ïa kitei ki jaka, ban ïa kynduh ïa ki paidbah, ban swar jingmut na ki bad ban ïoh ruh ka jingmynjur na ki.
Ki la pynpaw ruh ba ka jingpynbeit pud haka wat kaba Ar kan kham eh bad jwat, hynrei kum ki Myntri Rangbah ki la kular ruh ba kan long kaba janai katkum ka rai bad ka jingmynjur jong ki paidbah haka jingtrei ryngkat bad ka tnad Survey of India, ha kaba yn thaw ruh ïaki Regional Committee hapoh 15 sngi, ha kaba yn khlieh ruh da ki Myntri ka jylla Meghalaya bad Assam kum ki Chairman, bad ha kitei ki committee yn kynthup lang ruh ïaki nongmihkhmat na Karbi Anglong District Council kumba ki don ki jaka ba ïatyngkhuh bad ka Karbi Anglong.
“Ngin nym kyrkieh ïaka jingpynbeit pud ha ka wat kaba ar kumba kadei ruh ka jaka kaba kham jwat ban pynbeit, hynrei ngin ïaleh ban pynbeit ha kata ka rukom kaba ai jinghun ïaki paidbah ba shong ba sah ha ki thaiñ khappud khamtam ban pynbeit katkum ka rai bad ka jingmynjur jong ki paidbah kiba shong ba sah ha katei ka thaiñ” la ong kitei ki 2 myntri rangbah.
Shuh shuh kila ong ruh hadien bala thaw ïaki regional committee naka liang jong ki kum ki myntri rangbah kin sa leit jngoh ruh ïa kitei ki jaka kum ka jingai mynsiem ïaki paidbah.