Lada sah marwei ruh kam lei lei ngi leh ïa kaba dei ban sah rekod pateng la pateng : Prestone

Shillong, Nailar, 21: U National Vice-President ka NPP uba long ruh u Symbud myntri Rangbah ka jylla u Bah Prestone Tynsong ha ka sngi Thohdieng u la ong ba ka NPP kam salia ban leh ïa kino kino ki kam kiba bha na bynta ka jylla wat lada don ka jingkynthah na ki seng saiñ pyrthei kiba don lang ha ka sorkar.
Haba kren ha ka jingpynskhem ïa ki nongkitkam bad ïa ka Jaiaw Circle ha Ïing Dorbar Jaiaw Shyiap-Lumpyllon jong ka NPP u Bah Prestone u la ong ba kiba bun ki seng saiñ pyrthei ha ka jylla ki la pihuiñ ïa ka NPP namar dei tang ma ka na ki seng saiñ pyrthei na ka Thaiñ Shatei Lam Mihngi kaba ïoh jingithuh kum ka National Party.
U Bah Prestone u la ong ba na ka liang ka NPP kaba ïalam ïa ka sorkar ka la leh ïa ki kam kiba bha tam na bynta ka jingbit jingbiang ka jylla da kaba ai nuksa ïa ka jingkhot ïa ka HNLC sha ka miej jong ka jingïakren ïasuk.
“Ngi na ka sorkar bad na ka NPP kaba ïalam ngi buh hakhmat ïa ka jylla bad don ruh kiba kynthoh ïa ka jingkhot ïakren ïasuk ïa ka HNLC hana ba ki don sa tang khyndiat ngut, hynrei nga kwah ban ong hangne ba na ka liang jong ngi ngim kwah ba uwei ruh u samla ka jylla ba un sakma na ka sem” ong u Bah Prestone bad u la bynrap shuh shuh “wat ha ka jingpynbeit pud bad ka jingthmu ban wanrah ïa ka ki regulation ban teh lakam ïa ka kam khalai kaba ym ju don ba leh ha ki san phew snem ngi shah kynthah ym sngewthuh sngewthaw shuh. Don kiba kynnoh ruh ba ngi thmu ban pynlong ktem khalai ïa ka jylla hynrei nga kwah ban kren da kba shai ba ka sorkar kan ym thom da ka bor ban buh ïa ka jaka khalai khamtam ka Cassino bad dei u paidbha uban rai la un pdiang ne kyntait ïa ka Cassino”.
“Phi ïohi ka jingshah kynthoh kaba bun wat na ki seng kiba don ha ka sorkar ruh, ngi kum ka NPP kaba ïalam ïa ka sorkar ngi kwah ban leh ïa kaba bha tam bad kaban sah ka record pateng la pateng wat lada ngi sah marwei ngim salia” ong u Bah Prestone.
Haba ïadei bad ka jingjied ka NPP ïa u Bah Ransom Sutnga kum u kyrtong na North Shillong u bah Prestone u la ong ba namar u tip bha u dei u briew uba biang ka maiñ bad ka jingstad ban long kum u MLA.
“Mynnor lada ïohsngew ïa ka kyntien Mawkhar bad Jaiaw ngi sngew shynraiñ namar kibun ki briew kiba stad ba shemphang bad kba biang ka rynïeng rynïot, hynrei mynta pat ngi ïohi ba ka North Shillong tang ha Assembly bad ngi ïohi ruh ha ka rynïeng kaba tang shiphut” ong u Bah Prestone.
U Bah Prestone u la ong ruh ba ka dei ka por ïa ki nongshong shnong jong ka 17 Noirth Shillong ban jied da u briew uba stad bad uba proh ban trei na bynta ka jaidbynriew ym uba ieid jaidbynriew tang da ka jingsnngew ne ka emotion bad u la ong ruh dei tang u Bah Ransom uba biang ban shim ïa kane ka lyngkor.
Haba ai jingkren ha kane ka sngi u Bah Ransome u la ong ba kum u kyrtong u buh hakhmat eh ynda u la jop ban rat dyngkhong ïa ka jingkyrduhkam ki samla jong ka North Shillong namar kiba bun ki samla kim ïoh kam watla kiba la biang ka jingnang jingstad. Shuh shuh u la ong ruh ba ka jingbym lah ban pynmih ïa ki IAS naduh u 2013 ka dei kaei kaei kaba kum ka jylla ka dei ban snghew lehraiñ bad u la ong ba na ka liang jong u kum u MLA lada lada ki paidbah kin ailad un trei tyngeh na bynta kane bad ruh ban sei shibun ki sahep sorkar.
Shuh shuh u la ong ba ka jingkyrduh um ha Jaiaw bad ka jingbym lah ban pynpoi surok sha ki katto katne ki kyntoit na ka liang jong u un sa shim khia ïa kane naduh mynta wat ban leit buh jingkyrpad sha u Symbud Myntri Rangbah ka jylla ba un shimkhia lem ïa kane.
Ha kane ka sngi ka NPP ka la ïoh ban pynskhem ïa ki 9 tylli ki unit kiba hap hapoh Jaiaw Circler ha ka jingïadon lang ki nongïalam ka Party ba kynthup ïa u Bah Bajop Pyngrope, Bah Mayborn Rapthap, Prof. D War, Wanlamphrang Kharmujai lem bad kiwei kiwei.