Shillong, Nailur 12: Ki Nongtrei ka Koit ka Khiah, naduh ki Doktor, ki Nurse bad kiwei ki Doktor jong ka Mawlasnai ki hap ban leit ai jingsumar sha ki 14 tylli ki Shnong ba don ha Khappud ka Meghalaya bad Assam hapdeng ka jingbym shngaiñ bad jingrit mynsiem.
Ïa kane la lap ha ka jingleit jngoh u MP ka Shillong, u Dr. Ricky Syngkon ïa kane ka Jaka Sumar kaba dpn ha Mawlasnai ha Shnong kaba don ha khappud ka Meghalaya bad Assam.
U Dr. Ricky u la ïathuh napdeng ki 50 palat tylli ki Shnong kiba hap ha ka Mawlasnai, 14 tylli ki Shnong kidei kiba don sha ki bynta jong ka Block II ne jaka ba ïaknieh bad ka Assam bad ki bapli ki Doktor bad ki Nurse kim shngaiñ haba ki lei tai jinghikai ne leit ai Awareness Programme bad kiwei kiwei de ki lad jingïarap na ka bynta ki paidbah namar ki bor ka Assam ki ju pyndik ïa ki na ka por sha ka por.
U MP u la ong ba ka long kaba sngew synei shisha ïa ki nongtrei ka koit ka khiah na nalor kiba bun ki jingeh ba ki mad ha ka PHC na ka jingbymbiang ka bor ding elektrik khamtam haba pynïaid ïa ki kor ki bor ban sumar ïa ki nongpang, nangta ka jingbymbiang ka um, ki jaka sah ne ki quarter jong ki nongtrei, ki hap ban leit sha kine ki jaka hapdeng ka jingrit mynsiem bad ka jingsyier.
U la ong ba kadei ka kamram jong ka sorkar ne ki bor synshar District ban peit ïa kane ka jingeh ba ki nongtrei ka koit ka khiah ki ïakynduh haba ki leit sha kine ki 14 shnong namar ki leit na ka bynta ki paidbah jong ka jylla hi kiba don hapdeng ka shitom shipa.
Kane ka jingleit jurip u MP ka long hadien ba u la ïoh ïa ka Memorandum na ka Shnong kaba la ai ha ka jingïalang ai khublei jong ka VPP ha Mawlasnai ha kaba kane ka Memorandum ka la kren ruh ïa ki jingeh jong kane ka Primary Health Centre ha Mawlasnai kaba ai ka jingshakri ïa ki palay 20 hajar ngut ki paidbah.
U MP u la ïakynduh ïa ki Doktor, ki Nurse bad kiwei kiwei pat ki nongtrei bad jurip ruh ïa ki kamra, ki kor ki bor bad kumjuh ruh ki iing sah jong ki, ha kaba u la lap ba ki long kiba la isangsot shisha namar bun ki la jot lut bad kim ishngaiñ shuh ban shong ban sah.
