Shillong, Nailur 12 : U Symbud Myntri Rangbah ba khmih ïa ka Tnad Transport Bah Sniawbhalang Dhar, un sa hiar jurip ïa ka kad liengsuiñ Shillong kaba ha Umroi ha ka 23 tarik u Nailur.
“Ngan sa leit jurip ïa ka Shillong Airport ha ka 23 tarik Nailur” ong u Bah Sniawbhalang haba ïakren bad ki nongthoh khubor ha ka sngi Balang.
Ha ka Sngi Balang, u Bah Sniawbha u pyntip ba ka Sorkar ka dang ap ïa ka kaiphod ban pynthikna la ka long ne em kaba lah ïa ki liengsuiñ kiba heh ba kin wan hiar ha Shillong Airport.
“Ngin dang ban ïoh ïa ka kaiphod ba khatduh na ka Consultant kompani bala thung da ka Airport Authority of India (AAI). Mar syn ïoh ïa ka kaiphod, ngin sa shim rai halor kane ka kam” ula ong.
Ula pyntip ba la khmih lynti ba ka consultant kompani kan sa aiti noh ïa ka kaiphod ha ka taiew ba kut jong u Risaw.
