Hapdeng ka jingdkut noh u tyllai ka MCCL, ïoh ka Mawmluh da ka Restaurant ba 1.39 Klur

Mawmluh, Rymphang 15: Hapdeng ka jinglynshop ka jinghiar ka ïhkam ïoh jam bad kamai kajih namar ka jingbym treikam shuh ka karkhana dewbilat MCCL, ha ka 14 tarik mynta u bnai, kaba dei artad ka Valentines Day, la plie ïa ka Monolith Restaurant ha ka Shnong Mawmluh, Sohra.
Kane ka Restaurant kaba don ha syndah jong ka 100 Waterfalls Camp, kadei kaba la shna da ka tnad Soil and Water Conservation ba la mang na ka Natural Resource Management Intervention Project ha ka jinglut kaba 1.39 klur tyngka. Na liang ka Meghalayan Age, ka la shimti ban pynitynnad ïa kane ka Restaurant kaba lah ban ïohi kyndiang ïa kiba bun tylli ki Kshaid ha Mawmluh bad kiwei de ki bynta jong ka Sohra.
Kane ka jingshna ïa ka Restaurant ka long hapoh ka jingpeit bad pynïaid lang ka Mawmluh Tourism and Allied Services Cooperative Society.(MTACS).
U Bah Cyril V Diengdoh, Director ka tnad Tourism, uba long u Kongsan bad plie ïa kane ka Restaurant, u la ong ba ha ka por ba u long SDO Civil ha Sohra, ym pat don satia wat tang kawei ka Hotel ruh, hynrei mynta ki Hotel ki lah don bad bun tylli ruh ki Homestay kiba biang bha ban sah ki briew. U la ong ba kane ka pyni ïa ka jingroi ka kam shang pyrthei ha Sohra, ha ki nongshang pyrthei kim sah shuh ha Shillong, hynrei ki wan beit sha Sohra ne sha Mawmluh. U la ong ruh ba ka long ka jingkyrkhu kaba khraw namar ba ka mei mariang ha kane ka thaiñ ka long kaba itynnad haduh katta ha kaba ki don ki Kshaid, ki Krem ki lum ki wah kiba ithiang haduh katta katta. “Kiba sah shane lehse kim da sngewthuh than ïa ka jingkordor jong ki, hynrei kiba wan na shabar ki kheiñ kor haduh katta katta”, u la ong, da kaba ban ruh ba ka lyngba ka Meghalayan Age ka Mawmluh kan nang kiew shuh shuh ha ka liang ka kam jngohkai pyrthei namar ka jingdon ka krem kaba la ioh ïa kane ka jingkheiñ snem ne ka Meghalayan Age.
I Kong Ibashisha Rynjah, Director ka tnad Soil and Water Conservation, I la iathuh ba ka jingshna da ka tnad treikam jong i ïa kane ka Restaurant ka long na ka bynta ban aikam aijam bad ban kyntiew ïa ka kamai kajih jong ki briew sha nongkyndong. I la ïathuh ruh ba la sdang tei ïa kane ka Restaurant ha u bnaui Jylliew ka snem 2022 bad lah ban pyndep hapoh ka por kaba biang da ka jingshimkhia ki nongïalam ka MTACS.
U Bah Banlam Lyngdoh, Secretary ka Shnong Mawmluh, ha ka jingkren jong u, u la ong ba ka Shnong Mawmluh ka long kaba donbok shibun namar ha ki snem hynriew phew ka la wan ka MCCL, hynrei mynta ba kane ka karkhana kam treikam shuh, ka jingwan kane ka Restaurant kan ïarap ban aikam aijam bad kyntiew ïa ki nongshongshnong jong ka Shnong. U la ong ba ka Shnong lyngba ki nongïalam kiba mynshuwa ruh ka la ïohi jngai ïa kane ban leh ïa ki kam pynroi ryngkat ka jingïatreilang bad ka sorkar.