Shillong, Rymphang 15 : Ka Kynhun Myntri ka Sorkar Jylla mynta ka sngi Palei, kala ai jingmynjur ïa ka Meghalaya State Investment Promotion and Facilitation Bill, 2024 kaba thmu ban bujli noh ïa ka Single Window Agency (SWA) da ka Investment Meghalaya Authority (IMA) ha ka ban pynjanai bad pynsuk ïa ka nongwan sengkam ne karkhana hapoh ka Jylla Meghalaya.
Haba ïakren bad ki nongthoh khubor hadien ka jingïalang, u Myntri Rangbah Conrad K Sangma ula ong “ïa kane ka Bill la ai jingmynjur da ka Kynhun Myntri bad yn sa rah noh ïa ka hapoh ka ïingdorbar Thaw Aiñ ban ïoh jingmynjur”.
Ula ong ba ka daw ha lyndet kane ka rai ka long namar ka SWA kala don la slem bha bad ki don shibun bah ki kyndon kiba hap ban pynjanai.
“Mynta da ka jingwanrah ïa kane ka Bill thymmai, kan don noh ïa ka rukom treikam ba long kumjuh, ha kaba yn don ruh ka application ba hap leh lyngba ki portal (website) bad kin don ki Tnad bapher bapher, ki ban ïadon bynta bad kane bad kan don ruh ka tracking system ban buddien ïa ki jingkynshew lane ki aplikeshon ban kynshew kam kiba wan shapoh ka Jylla” ong u Conrad.
Haba pynpaw ba ki don shibun jait ki jingsengkam ki ban pynshong nongrim kat kum ki projek, u Myntri Rangbah ula ong “Ki jingseng kam ba hapoh T.1 klur yn ai jingbit da ka Committee ba la khlieh da ki Deputy Commissioner bad ka jingseng kam ba hapdengT. 1 klur haduh T. 10 klur yn ai jingbit da ka Committee ba khlieh da u Chief Secretary katba ïa ka jingseng kam ba palat T. 10 klur yn hap ban phah sha ka Investment Meghalaya Authority (IMA), ka ban khlieh da u Myntri Rangbah ka Jylla”.
“Kumta, kane kan pynkloi ïa ka rukom aplai, buddien bad kan nang pynsuk ban sengkam sengjam hapoh ka Jylla Meghalaya” ula bynrap.
