Shillong, Rymphang 15: Ka Dorbar mangtyngka kaba ar jong ka sorkar MDA-2, kan sdang ha ka sngi thohdieng. Kumba ju long ka rukom kan sdang da ka jingkren lamphrang u Lat ne ka Governor’s Speech. U Lat Phagu Chauhan udei u bym pnah ban kren phareng bad kumta ïa ka jingkren lamphrang jong u kumba la long ha ka snem baladep, un kren da ka Hindi. Tangba mynta ka kynti kan don ka jingpynkylla sha ka phareng katba u nang kren.
Dang shen u Lamphang ka ïingdorbar, u Thomas Sangma, u la ïathuh ba ka Assembly kan pyndonkam da ki Artificial Intelligence ha kane ka sien shong dorbar.
Kane ka jingbuh ka ophis jong u Speaker ka Meghalaya Legislative Assembly ïa ka jingpynkylla ktien, ka long hadien ka jingdawa jong ka Seng Voice of the People Party (VPP) hadien ba la thnam ka dorbar ha ka snem baladep, namar ka jingpyrshah ki MLA jong ka Seng ïa ka jingkren hindi jong u Lat.
Lehse kan dei ka sien kaba nyngkong eh ha ka history jong ka jylla ba ïa ka jingkren jong u Lat yn kylla sha ka ktien phareng katba u dang kren. Wat lada ha ki snem baladep, haba u Lat u pule da ka hindi ïa ka jingkren jong u, ki MLA pat ki ïoh da kaba la thoh ha ka ktien phareng.
Ha kane ka dorbar u Myntri Rangbah, u Conrad Sangma, uba bat ruh ïa ka tnad Finance, un wanrah ruh ïa ka mang tyngka jong ka jylla na ka bynta u snem 2024-2025. Namar ba kan don ka elekshon Lok Sabha, ha kaba ka Meghalaya ka don artylli ki Seat, la khmih lynti ba kin don ki mat kiban khring ïa ki paidbah.
Namar ka jingwan ka elekshon MP, ka don ka jingantad ba ki MLA na ki Party bapher bapher ki lah ban pynpaw pyrthei bha ha kane ka dorbar, khamtam na ka liang ka NPP kaba ïalam ïa ka bor synshar bad kumjuh ruh na ki liang pyrshah kiba kynthup ïa ka Congress, Trinamool Congress bad ka VPP.
