Haduh 2 lak matrik ton yn lilam ïa u dewïong, ngin ym shah khlem pyllait lang ïa baroh: W. Nongtdu

Jowai, Jylliew 23: U Wanshwa Nongtdu uba dei u Spokesperson ka MCTODA, mynta ka sngi 23 tarik u Jylliew haba ai jingkren ha Madan phutbol jong ka Ladrymbai Dongwah, East Jaiñtia Hills District, ula ïaroh ïa ki nongïalam ka JCOMSWA kiba la shlur ban ïatai bad ki IAS ha Secretariat kumba 3 kynta eiei haduh ba u Chief Secretary uba hap ban suki bad aiti ha uwei pat u IAS.
“Ban ïoh ïa ki Leader kiba shemphang ha kane ka juk kaba mynta ka long kaba eh, lada ngim ïoh kum kine ki nongïalam kiba satar ‘naduh kato ka sngi 17 tarik ha Shillong ngi la shah rem lypa’, hynrei dei da ka jingshlur jong ki kaba hap dei ban pyrta lang lai sien ‘imslem JCOMSWA,” u la ong.
Ka jingpynlong ïa ka jingshah thngan ka long kaba eh ïa kano kano ka kynhun ong u ma Wanshwa, hynrei kane ka jingïohi jngai jong u ma Marshall S.B Biam uba la shim ïa ka sien jam ban sangeh ka jingshah thngan lem bad ki dkhot da kaba shim da kawei pat ka lynti ka long kaba dei eh bad la kyntu ban nym shet kylla ïa u paidbah.
Naduh u snem 1984 la ïoh ban tih laitluid ïa u dewïong hynrei ha u snem 2014 la pynshitom ïa u paidbah bad mad shibun ki jingeh, kaba sngewsih ka long wat haba la don ka kynhun kaba la lum pisa ban ïakhun sha ïingkashari ban ïoh tih dewïong hynrei haduh mynta khlem ïoh report, ong shuh shuh u ma Wanshwa.
Ula kyntu ïa ki dkhot ka JCOMSWA wat suki ïaid shakhmat khnang ba ki paidbah kin ïadonlang ha syndah syndah, la lyntu ïa ki 4 ngut ki dkhot ka JCOMSWA kiba ïoh bynta ban ïadonlang ha ka Mining Policy jong ka MMDR ba kin kynmaw ïa ka nongrim kaba skhem katkum ka jingdawa ki paidbah.
Lada dei ka sorkar kaba shimkhia ula pynkynmaw ha u snem 2008 kila sdang ban wanrah ïa ki Cement Factory bad la sdang ban pyntreikam ïa ki minor bad major policy, hynrei ïa u dewïong ka sorkar kam pat lah ban thaw ïa ki kyndon treikam naduh ba la shah khang. Kumta la dei ka por ïa ki paidbah ka East Jaiñtia ban pynkhreh ïa ka Mining policy bad ban bishar ban peit bniah lang ïa ka.
U la pynsngew ki nongmihkhmat ki trei tang na ka bynta 5 snem ka samoi, hadien kata mano ba pynïaid ïa ka kam ki dei ki IAS bad ka jingkhot mynta ka long lyngba ka jingshlur ki paidbah lyngba ka jingïalam ka JCOMSWA ban mih ïakhih na ka liang ka sorkar ka la pdiang ïa ka jingdawa.
“Kano kano ka jingïaleh ka shong ha ka bor ki paidbah, wat u Symbud Myntri Rangbah ka sorkar jylla ula pynbna sa lai bnai la plie ïa ka jingtih dewïong kane ka paw ïa ka dak la shim namar ki nong East Jaiñtia kila long kiba stad da ka jingtip ïa ka aiñ,” u la ong.
Ula kitbok kitrwiang ïa ka JCOMSWA da kaba kular ban ïatreilang ban mih shakhmat na ka bynta ka thaiñ East Jaiñtia Hills.
Ula pynsngew ruh ka la don ka jinglilam (auction) ïa u dewïong haduh 2 lak matrik ton bad ïa ka Challan yn sa pyllait ha kine ki sngi ban wan, hynrei lada ym plie lang ïa ka kam tih dewïong yn ym shah ban shalan ïa utei u dewïong ban lilam.